CEBU, Philippines - Ang pito ka mga suspek kinsa giingong nalambigit sa human trafficking sa lima ka mga batan-ong babaye sa amihanang Sugbo posibleng mag-atubang og kasong RA 9231 or Anti-Child Labor Law ug RA 9208 or Expanded Trafficking in Persons Act of 2012.
Si Insp. Catalina Diotay, hepe sa Women’s and Children’s Protection Desk (WCPD) sa Cebu Provincial Police Office (CPPO), mibutyag nga nagpaabot na lang sila sa ubang dokumento nga kinahanglanon una nila pasaka ang kaso labi na ang medical examination results sa mga biktima.
“Ipa-medical exam namo sila while in the custody of the Department of Social Welfare and Development (DSWD)-7,†matud ni Diotay.
Si Diotay midugang nga ila usab nga gitan-aw kung unsa pay laing kaso nga ilahang mapasaka batok sa mga suspek nga sila si Charry Rabuna, Marife Cañar, Lara Mae Coloma, Linda Paulin, Jeraly Oliamot, Jenky Lubiano ug Rosario Hinuguin, nga anaa na karon sa karsel sa Naga City Police Station.
Ang WCPD-CPPO mohimo na usab og surveillance sa ubang mga resorts sa amihanang Sugbu human sa maong hitabo.
“Dili man gud na malikayan kay daghan og resorts unya daghan ang turista nga foreigners unya naa gyu’y minor pa mangilad na nga 18 na sila,†matud niya.
Ang mga biktima na-rescue sa managlahing resort sa lungsod sa Daanbantayan ug San Remigio adtong Sabado sa kaadlawon.
Ang mga biktima nagpangidaron og 15 ug 16- anyos nga matud pa gisaaran nga mamahimong kahera sa usa ka tindahan apan nahimong entertainers sa bars.
Ang maong operasyon nahimo human masikop sa kapulisan ang ingong drug pushers nga sila si Ivan Lucero, Zosima Olivar ug Gaze Canales sa usa ka bar sa Barangay Pajo ug nakuhaan kini og 105 nga gagmay’ng pakete sa shabu nga mubalor sa P28,000. (/EIM) (BANAT NEWS)