CEBU, Philippines - Unom ka mga lalaki duha niini nagtrabaho sa Tsunishi Heavy Industries sa lungsod sa Balamban ang nadakpan sa akto sa kapolisan nga nagsuyop og shabu didto sa Sitio Lawis-Luray-2, dakbayan sa Toledo sa miaging gabii.
Ang mga suspek mao sila si Raymund Lebringka, 25, minyo, nagpuyo sa Awihaw, Toledo City ug nagtrabaho sa Tsunishi Industries, Marlon Santiago, 35, minyo, taga Magsaysay Hills, Toledo City, Vincent Caballero, 28, minyo, taga Proper Tubod, Toledo City, Joel Tan, 42 anyos, minyo nga taga Magsaysay Hills Toledo City, Balvino Basalo, 47, minyo taga Luray-I Poblacion Toledo ug Alejandro Mahinay, 41, minyo ug taga Luray-1 Toledo City.
Ang mga butang nga nasakmit gikan sa mga suspek mao ang upat ka basiyo sa gagmay’ng plastic nga gituohang gisudlan sa shabu, tin foil, rolled tissue, disposable lighter, improvised tooter ug uban pa nga kagamitan sa pagsuyop og shabu.
Si SPO4 Carmilito Hornales, desk officer sa Toledo City Police, mibutyag sa Banat News nga ang kapolisan mi-responde unta og alarma sa tulis apan sa ilang pagpauli sa ilang buhatan ilang naagian ang mga suspek nga nagsuyop og shabu sa usa ka payag sa maong lugar.
Ila dayon kining gironda ug naabtan nila sa akto ang mga suspek nga nagsuyop og shabu hinungdan nga ila dayon kining gisikop.
Gisakmit usab sa kapolisan ang mga basiyo nga gisudlan sa shabu ug ubang kagamitan.
Ang mga suspek gitanggong na karon sa karsel samtang gihikay ang tukmang sumbong nga ipasaka batok kanila. (/WC) (BANAT NEWS)