CEBU, Philippines - Tulo ka tawo ang nasikop sa drug best samtang lima ka menor ang gi-rescue sa mga sakop sa Provincial Anti-illegal Drugs Special Operations Task Group sa pagpangronda nga gipahigayon nila sa barangay Pajo sa lungsod sa Daanbantayan sa miaging adlaw.
Nasikop pinaagi sa buy bust operation sila si Ivan Lucero alyas Bong, Zosimo Olivar ug si Gaze Canales.
Ang tulo gikatahong nakuhaan og 105 ka pakete nga gituohang shabu nga mobalor og P28,050.00, marked money ug usa ka kalibre .45 nga pistola nga may lima ka mga buhing bala.
Sa samang operasyon gi-rescue sa mga sakop sa PAIDSOTG ang lima ka dalagita nga nag-edad og usa ka 15 ug upat 16-anyos maoy gihimong guest relation officers (GRO) sa Rosa Video K ug Horse Shoe Video-K nga gipanag-iya nila ni Linda Paulin ug Rosario Hinguin sa barangay Hagnaya. Gawas sa mga menor lima ka hamtong na nga GRO ang gidala sa kapolisan
Ang mga na-rescue nga mga menor kuyog ang tanang dinakpan gidala sa buhatan sa Provincial Intelligence Bureau sa CPPO aron ma-turnover sa social workers ug ingon man ang posibleng pagpasaka og kasong kalapasan sa Expanded Anti-Human Trafficking in Persons Act. (BANAT NEWS)