CEBU, Philippines - Tapuson karong gabii ang mga kalihokan sa ika-44 ka tuig nga Charter Day sa dakbayan sa Mandaue sa usa ka pinirmahay sa deed of donation sa luna sa kagamhanan sa dakbayan ngadto sa buhatan sa Korte Suprema nga gipahigayon sa city hall ground.
Si Mayor Jonas Cortes nga nag-representar sa kagamhanan sa maong dakbayan maoy mangulo sa pagpirma sa kasabutan alang sa pagdonar og luna sa kagamhanan sa maong dakbayan.
Samtang si Atty. Jose Midas Marquez nga nagrepresentar sa Korte Suprema mao usab ang mopirma sa pagdawat sa luna nga 1,000 metro kuwadrado nga nahimutang sa luyo nga bahin sa Hall of Justice.
Si Konsehal Diosdado Suico nga maoy chairman sa executive committee nga maoy gitahasan sa pagpasiugda sa mga kalihokan naglakip sa ceremonial switch-on sa modernong traffic lights sa siyam usab ka mga eskina sa kadalanan sa dakbayan.
Sugdan ang mga kalihokan sa alas-10 ang takna sa buntag sa Biyernes sa Bantay Mandaue Command Center nga gitawag usab og Mandaue Integrated Response System Command Center nga nahimutang sa city hall.
Gipasabot niya nga ang mga kalihokan ilang gipahaum sa tema alang sa maong kasaulogan karong tuiga nga “Mandaue: Cradle of Love, Prosperity and Opportunity.†(/EIM) (BANAT NEWS)