CEBU, Philippines - Department of Health (DOH) mipasidaan nga dili pa gyud luwas nga kaligoan ang kadagatan sa sidlakang bahin sa probinsya sa Sugbu nga naapektahan sa oil spill tungod sa pagkalunod sa barkong MV Saint Thomas Aquinas.
Si DOH Region 7 Director Asuncion Anden mibutyag nga dunay mga sakit-sakit nga makuha kung pugson nga maligo sa dagat nga naapektahan sa oil spill.
Lakip sa mga sakit nga makuha matud pang Anden mao ang sakit sa tiyan, leukemia, paglisod sa ginhawa, mga cancer ug poisoning agi sa mga toxic chemicals ug heavy metals nga naa sa bunker oil ug krudo.
Matud pa ni Anden nga ang mga mananagat, mga nanabang sa paghipos sa oil spill ug mga technical divers exposed sa maong mga hazardous chemicals maong iyaha silang giawhag nga magsul-ob og hustong gamit usa motuslob sa tubig sama sa gloves ug botas.
“Let us take precaution especially when we are near the coastal line. The livelihood at the coast is now severely affected,†matud pa ni Anden.
Gani si Dr. Expedito Medalla ang pangulo sa Regional Epidemiology and Surveillance Unit-7 mibutyag nga dunay pito ka mga molupyo sa Cordova nga mitabang sa pagpanglimpyo sa oil spill ang giingong nagsakit og respiratory infections ug nagmulo sa kasakit sa ilang mata.
Sa pagkalunod sa MV. St. Thomas Aquinas niadtong Agosto 16 sa gabii, migawas ang krudo sa barko nga may dalang 20 ka toneladang diesel fuel ug 120 ka toneladang bunker oil. (BANAT NEWS)