CEBU, Philippines - Nadakpan sa kapolisan kagahapon ang suspetsado sa pagpatay kang Atty. Santos Anthony Oraiz Cortes niadtong Mayo 26, 2009 sa parkingan sa Fatima Church sa barangay Basak, dakbayan sa Mandaue.
Ang nasikop mao si Joselito Japus alias “Balong†30 , ulitawo, nga lumad nga taga Tayud, Liloan apan nagpuyo sa sitio Centro sa barangay Labogon sa dakbayan sa Mandaue dihang gipatay niini si Atty. Cortes.
Ang team sa Investigation Detection and Management Bureau (IDMB) sa Mandaue City Police Office (MCPO) nga gipangulohan ni Senior Inspector Jimmy Fortes maoy nakadakop kang Japus nga didto na magtagotago sa barangay Sta. Cruz, Quezon, Bukidnon Province.
Ang warrant of arrest giluwatan ni Judge Ulric Canete sa Branch 55 sa Regional Trial Court (RTC) 7 nga nagbase sa maong dakbayan.
Kauban sa team ni Senior Inspector Fortes sa pagdakop kang Japus mao sila si Inspector Zenaido Sanchez, SPO3 Marcos Noval Jr., PO2 Roldan Balingbing, PO1 Jerry Gasgonia ug PO1 Cristito Raboy.
Si SPO3 Noval nga nahinabi sa Banat News miingon nga dugay na nilang gipangita ang maong suspetsado hangtod nga nakadawat sila og kasayuran labot sa usa ka tawo sa barangay Sta Cruz, Quezon nga nalambigit sa pagpatay og pari sa dakbayan sa Talisay.
Matud pa ni SPO3 Noval nga ilang gipangayo ang description sa maong tawo nga giingong nalambigit sa pagpatay og pari hangtod nga ilang nasuta nga mao kini ang ilang gipangita nga nagpatay kang Atty. Cortes.
Dugang pa ni Noval nga mga pipila na ka tuig ang nakalabay ang suspetsado nagbalhinbalhin na og pinuy-anan sa Mindanao.
Nahiabot kini sa Cagayan de Oro , ug hangtod na sa Sta. Cruz, Quezon diin didto nila hidakpi kansang panginabuhi mao ang pagpasuhol og trabaho sa basakan.
Ang suspetsado nga nagtingkagol na karon sa bilanggoan sa Mandaue City Jail hugtanon hinuong mihimakak nga nalambigit kini og krimen. (BANAT NEWS)