CEBU, Philippines - Wala makaabot sa gipangagpas untang usa ka milyon ka mga Sugbuanon ang mitambong sa gipahigayong “Million People March†alang sa pagwagtang sa “pork barrel†sa mga kongresista diha sa Plaza Independencia kagahapong adlawa.
Ang hepe sa Cebu City Police Office nga si Senior Superintendent Noli Romana dihang nahinabi sa Banat News mibanabana nga 3,000 ngadto sa 3,200 ka mga tawo ang mitambong sa maong rally.
Sumala pa sa usa sa mga nagpasiugda sa maong rally nga si Dr. Rowena Burden nga malipayon gihapon sila kaayo kay usa ka gatos ra gyud unta ka tawo ang ilang tumong nga motambong sa rally.
“Ang amo ra intawong initial nga plano is magkita ra mi sa Fuente and have a hundred people gathered,†matud pa ni Dr. Burden.
Asoy ni Dr. Burden nga wala silay grupo nga girepresentahan apan mihangyo lang sila sa Movement for Liveable Cebu aron sa paglukat sa ilang permit.
Dugang pa ni Dr. Burden nga ilang hinuwaman ang stage, ang sound system ug ang tent nga ilang gimuntar didto sa Plaza Independencia.
Usa sa mga nitambong sa maong rally mao ang usa ka polio victim nga si Maria Sheila Padilla, 39, ug nagsakay sa iyang wheelchair nga nahinabi sa Banat News mitug-an nga di gyud babag ang iyang kahimtang sa pagpadayag niya sa iyang pagpaabot sa mga magbabalaod nga dako siyang uyon sa pagwagtang sa ilang pork barrel.
“Talagsaon ra ning panahona nga maka-express ta sa atong kaugalingon kay para ra man pod ni sa atong kaayohan,†subay pa ni Padilla.
Lakip sa mga miapil sa rally mao si Allan Medalle nga naa nagpuyo sa kadalanan kuyog sa dul-an ka mga 30 ka mga street dwellers, nisugid siya sa Banat News nga uyon siya nga wagtangon ang pork barrel kay mao ni hinungdan nganong naglisod sila ug ang katawhan Pilipinhon.
Matud niya ang mga parehas niya wala gyod makapahimulos sa pork barrel ni bisan kinsa nga kongresista nga maayo lang mamutbot panahon sa kampanya.
Ang retired nga banker nga si Dario Lopez sa lungsod sa Cordova mitug-an nga mi-apil siya aron malakip siya sa mga tawong buot nang mawagtang ang pork barrel nga nahimo nang tinubdan sa kurapsyon sa mga kongresista.
“Dugay na gyud kaayo ko nakahuna-huna gyud nga there’s really a need nga mausab ning atong paggasto sa gobiyerno, because when I was still employed I was already paying tax nya imong makita mga karsada binuangan lang og trabaho unya kahibawo ka nga ang mga government officials gipangkurakot lang ang mga kwarta sa mga tawo,†sumala pa ni Lopez.
Miapil sab sa rally ang mga seminarista sa Rogationist Seminary ug matod pa ni Napoleon Facunla nga kahibawo gyud siya nga ang pork barrel nga wala gyud mapadulong sa katawhan.
Tungod sa kalamposan sa maong rally malipayon ang mga nagpasiugda niini pinangulohan ni Burden, Marc Canton ang lead convenor sa Movement for Liveable Cebu, Raul Puentespina, Dr. Shawn Espina, Dr. Elmer Habagat, Louella Alex, Rudy Alex ug si Paul Hubahid.
Gilangkoban ang maong rally sa mga nagkalain-lain nga pundok nga naglakip sa mga professionals, negosyanti, sakop sa simbahan, mga Non-Government Organization, mga tinun-an, mga progresibong grupo ug ang mga street dwellers.
Diha usab sila si Cebu City Mayor Michael Rama, Bise Mayor Edgar Labella, ug kanhi mayor Alvin Garcia. (BANAT NEWS)