CEBU, Philippines - Tungod sa pagkapopular na sa Pantawid Pamilyang Pilipino Program (4Ps) sa Department of Social Welfare and Development sa rehiyon (DSWD-7), nagkadaghan ang mga bata nga estudyante karon. Sila ang nakabenepisyo ug nakapahimus niining maong conditional cash-transfer ug mikunhod usab ang mga batang menor de edad nga nagtrabaho na.
Apan labaw sa tanan mibahar usab ang gidaghanon sa mga batang moundang sa pag- eskuyla tungod sa pagka walay kwarta nga ikagasto. Kini mao ang pamahayag ni Aileen P. Lariba, usa sa mga tigpamaba sa DSWD 7 diin matud niya ang mga inahan nga adunay negatibong kahimtang sa panglawas nahimo nang positibo ilabi na niadtong mga nagpasuso.
Sumala pa ni Lariba nga sa tuig 2012 gihimong prayoridad sa 83.6 porsiyento ka mga kabus nga pamilya ubos sa maong programa ang pagtomar og bitamina ug usab de-worming ug lakip na ang pag-monitor sa ilang timbang.
Dugang pa ni Lariba nga nahimo nang flag bearer of hope kining maong programa sa natad sa pagsulbad sa problema sa kakabus ug usab sosyal nga kalamboan sa Pilipinas tungod sa sayantipikanhong sistema niini ug ang iyang kasihag.
Gisaysay ni Lariba nga ang mga makasugakod sa mga kondisyones sa programang 4Ps mogradwar human sa lima ka tuig diin ibalhin na usab sila sa Sustainable Livelihood Program (SLP) nga programa usab sa DSWD aron ipadayon ang ilang mga paningkamot sa pagtadlas sa kakabos. Giklaro ni Lariba nga adunay unang set nga 25,000 ka mga benepisyaryo ang giingong makapahimus sa programang SLP.
Dugang pa ni Lariba nga ang 4Ps ning tuiga gihangop sa labaw sa 889,000 ka mga kabalayan sa tibook nasud diin ang 43, 329 niini nagagikan sa Central Visayas.
Midugang siya nga mao na kini ang 7th set sa mga benepisyaryo nga makapahimus sa maong programa sukad pa niadtong tuig 2008.
Matud pa ni Lariba nga sa 43, 000 ka mga kabus nga kabalayan sa Central Visayas, ang unang batch niini nga 1,731 ka mga benepisyaryo nagsugod sa bulan sa Agosto ning tuiga diin ang tanang upat ka probinsya sa rehiyon 7 adunay tagsa-tagsa ka mga bag-ong membro nga naglangkob sa 177 ka mga kabos nga kabalayan .
Ang mga gideklarar nga opisyal nga mga benepisyaryo sa 4Ps tagsa-tagsa nga mipirma ug misabot sa Oath of Commitment diin sulod niini mao nga ilang sundon ang mga gitakdang kondisyones sa maong programa nga pre-natal and post-natal, preventive health check-up ka usa matag bulan. Sa probinsya sa Bohol nga may 43 ka mga lungsod , 708 usab ka kabus nga kabalayan sa probinsya sa Sugbo nga nagagikan sa 50 ka LGUs, 723 ka kabus nga kabalayan ang makapahimus sa probinsya sa Negros Oriental .
Didto naggikan kini sa 18 ka LGUs samtang 123 ka kabus ka kabalayan usab ang makabenepisyo sa upat ka lungsod sa probinsya sa Siquijor. May 85 porsyento nga attendance sa mga bata sa tunghaan ug lakip na usab ang ka usa sa matag bulan nga attendance sa mga ginikanan sa family development sessions.(WC) (BANAT NEWS)