CEBU, Philippines - Ang Department of Labor and Employment (DOLE-7) mipahigayon og duha ka adlaw nga Regional Career Advocacy Congress uban sa tema nga “Follow the guide. Tag a career. Like the futureâ€. Sumala pa ni Emmanuel Ferrer, Regional Labor Communication Officer sa DOLE-7 nga tumong sa maong kalihokan nga kahatagan ang mga magpapatigayon og lab-as nga mga kasayuran sa labor market.
Kini usa sa epektibong paghatod og maayong giya sa trabaho ngadto sa mga nagtungha ug sa mga nangita pa og trabaho.
Paglig-on sa panag-alayon ug kooperasyon sa mga magpapatigayon ug importanteng kasayuran sa pamuo alang sa pagpahigayon og mga aktibidad sa paghatag og giya sa pagpanarbaho.
Mipadayag sa iyang dakong pasalamat si DOLE-7 Regional Director Chona Mantilla ngadto sa mga magpapatigayon nga nagagikan sa pribado ug pampublikong sector.
Iya kining gihinganlan nga mao ang Department of Education (DepEd), Commission on Higher Education (CHED), Technical Education Skills Development Authority (TESDA), Department of Science and Technology (DOST) ug Professional Regulation Commission (PRC) tungod sa ilang lig-on nga kooperasyon.
Gipadayag ni Mantilla ngadto sa mga magpapatigayon ug kaalayon niini nga ang output sa maong aktibidad mahinungdanon kaayo sa natad sa paghatag og maayong giya sa mga magtutungha sa kung unsa ang maayong sudlan nila nga trabaho.
Ikaduha, kung unsa usab nga dalan ang ilang subayon aron mapalambo ang ilang abilidad sa panarbaho sa umaabot.
Giklaro ni Mantilla nga ang output sa ilang kalihokan magamit usab sa pag-update nila sa ilang rehiyonal ug lokal nga plano sa panarbaho alang sa rehiyon 7.
Gipresentar usab ni Assistant Regional Director Efren Carreon sa National Economic Development Authority (NEDA-7) ang Regional Economic Situationer kung unsa ka mauswagon ang aktibidad alang sa ekonomiya sa rehiyon diin subay pa sa taho sa National Statistical Coordination Board (NSCB), ang rehiyon 7 nahimutang sa ikatulo nga dapit kansang ekonomiya mitubo sa tuig 2012.
Base sa record may 8.1 porsyento ang pag-uswag niini samtang ang Zamboanga peninsula ang nahimutang sa unang bahin diin aduna kini 12.4 porsiyento ug gisundan kini sa rehiyon 8 nga adunay 10.6 porsiyento.
Samtang si Jessica Uy, Supervising LEO sa DOLE-7- Technical Services and Support Division (TSSD)- Employment Welfare (EW) maoy mipresentar ngadto sa mga magpapatigayon mahitungod sa kahigayunan sa trabaho sa mga magtutungha isip giya sa ilang pagpanarbaho sa umaabot.
Sa maong kalihokan ang mga entrante gihatagan og hustong kasayuran sa lab-as nga mga panginahanglan sa TESDA, PRC ug DOST. (BANAT NEWS)