CEBU, Philippines - Ang mga sakop sa Special Board of Marine Inquiry (SBMI) nga gimugna sa Philippine Coast Guard magsugod na karong adlawa sa paghimo og imbistigasyon kabahin sa pagdam-ag sa M/V Sulpicio Express Siete ngadto sa M/V St. Thomas Aquinas.
Ang duha ka kapitan sa maong mga barko gipadad-an na og summon aron motambong sa imbestigasyon nga ipahigayon sa mga sakop sa SBMI sugod karong buntag.
Matud ni Cebu Coastguard Commander Weniel Azcuna atol sa interview sa Bantay Radyo nakadawat na siya og direktiba aron anhi sa Sugbo himoon ang SBMI tungod kay sagad ania sa Sugbo ang tanang aggrieved party.
Si Azcuna mibutyag nga si Commodore Gilbert Rueras ang hepe sa Maritime Services Command sa Manila maoy mangu sa SBMI.
Matud ni Azcuna wala hinoon sila’y apil sa maglangkob sa SBMI tungod kay gitahasan sila sa pagtutok sa nagpadayung search and retrieval operation ingon man paglimpyo sa oil spill nga nikatap karun didto sa kadagatan sa lungsod sa Cordova.
Si Azcuna mipadala na og summon ang duha ka kapitan sa nagkabangga nga barko ug obligado kini pagtambung sa maong himoong pakisusi.
Sutaon sa mga sakop sa SBMI kun ngano nga nahitabo nga nabanggaan sa barko sa Sulpicio ang panguwahian nga bahin sa barko nga iya sa 2GO Shipping samtang pareho kini nga naglawig sa Lawis Ledge kaniadtong miaging Biyernes sa gabii.
Si Konsehal Gerardo “Gerry†Carillo miingon nga iyang giawhag ang kadagkoan sa Coast Guard nga anhi sa Sugbo himoon ang imbistigasyon aron sayon ra sa mga saksi ang pagtambong sa maong kalihukan.Matud ni Carillo nga ang Integrated Bar of the Philippines (IBP) andam motabang aron ang pamahayag sa mga nakasaksi sa hitabo mahimo nga affidavit ug ikasumiter dayon sa mga sakop sa SBMI.
Hangtud kagahapon sa hapon gikataho nga miabot na og 75 ang gidaghanon sa mga namatay sa aksidente apan duna pa hinooy 45 nga wala pa makit-i.Gitataw sa kadagkoan sa 2GO Shipping nga kadtong mga “missing†nga pasahero dili pa maisip nga silang tanan patay na kay dunay posibilidad nga ang uban kanila naluwas ug nadala sa laing dapit.
Karong buntag, ang search and recovery operations sa ubang mga patay nga gituohang anaa pa ilawom sa barko ipadayon sa mga technical divers. (BANAT NEWS)