CEBU, Philippines - Aron mapapas ang kahadlok sa publiko pagkaon og isda karong mga panahona ang mga opisyal sa kagamhanan sa dakbayan sa Mandaue, fish vendors ug buhatan sa Bureau of Fisheries and Acquatic Resources nagsawo pagpangaon og isda diha sa merkado publiko sa maong dakbayan.
Sinugbang isda, kinilaw nga bolinaw, nukos ug lambay ug uban pang putaheng isda maoy giluto ang gisaw-an sa boodle fight kagahapon sa udto.
Ang boodle fight gipangulohan ni Konsehal Jimmy Ceniza sa maong dakbayan, Market Administrator Mosulini Suliva, Cesar Mercadal nga maoy head sa Solid Waste Management sa dakbayan, Engineer Gaga Mendoza ug uban pa.
Si Allan Poquita, assistant regional director sa BFAR 7 nga usa sa miapil sa pagkaon miingon nga luwas ang mga isda nga gibaligya sa merkado publiko sa dakbayan ug sukwahi kini sa pagtuo nga makadaut nga nakaingon nga walay namalit niini. Gipasabot niya nga ang dapit sa kadagatan sa dakbayan sa Lapulapu, dakbayan sa Talisay ug lungsod sa Cordova nga naapektahan sa oil spill dili maduolan sa mga mananagat tungod sa nagpadayong search and retrieval operation sa mga divers.
Wala say mananagat nga anha mangisda o mamasol sa dapit nga dunay oil spill.
Iyang gipasabot nga ang isda nga gitumod sa kamerkadohan karon gikan sa laing dapit sama sa Bohol, Masbate, Iloilo, Danao, Negros ug Mindanao nga layo kaayo sa nalunod nga barko sa kadagatan sa dakbayan sa Talisay.
Si Poquita miingon nga aron masiguro gyud nga di makadaut ang isda nga ilang kan-on, mas maayong tarungon kini paglimpiyo, pagkuha sa himbis, pagtangtang sa hasang ug tinai sa dili pa lutoon. (BANAT NEWS)