CEBU, Philippines - Gipakatap na sa Bureau of Immigration and Deportation-7 ang hulagway ni Janet Lim Napoles ug ang igsuon niini nga si Reynaldo Lim sa tanang teller o counters sud sa international departure ug arrival area sa Mactan Cebu International Airport.
Matud pa ni Atty. Brandon Enad ang Alien Control Officer sa BID sa MCIA pormal na nilang nadawat ang hold departure order ug warrant of arrest nila ni Napoles ug Lim.
Samtang si BID OIC Commissioner Atty. Ziegfred Misson mimando ngadto sa tanang opisyales sa BID sa pagdakop ni Napoles ug Lim kung kini moagi sa maong tugpahanan padung sa laing nasud. Arestuhon na nila si Napoles ug Lim base sa giluwatang warrant of arrest sa korte.
Gipasalig sa BID nga magmatngon kini kanunay sa ilang pagbantay sa tugpahanan aron dili kini makalusot sa mga akusado.
Matud pa ni Enad adunay kahimanan ang BID sa pagsusi kung peke ang passport sa usa ka pasahero diin dali kining ma-detect sa maong makinarya kun peke ang pasaporte.
Hinuon matud pa ni Enad nga wala sila makadawat og impormasyon nga si Napoles ug Lim ania sa Sugbu human kini gipasakaan og kasong serious illegal detention sa iyang kanhi sakop sa JLN foundation diin migawas ang warrant of arrest batok ni Napoles ug Lim.
Ang kaso may kalambigitan sa pork barrel scam nga gituki karon didto sa kaulohan tungod sa binilyong mga kwarta sa katawhan nga napunta sa bulsa sa ubang tawo inay sa mga proyekto. (BANAT NEWS)