CEBU, Philippines - Gipanid-an sa mga tinugyanan sa Department of Energy (DOE)7 ang usa ka shop sa lungsod sa Liloan nga motubil sa basiyong tangke sa butane. Si DOE Regional Director Antonio Labios mibutyag sa Banat News nga ang itubil pa gyud sa maong shop mao ang liquefied petroleum gas (LPG).
Matud niya nga kun mamatud-an kini nila pasakaan kini og kiha sa hukmanan tungod kay gawas nga illegal, peligro nga mahimong sinugdanan sa dagkong sunog.
Miingon si Labios nga ang lata o tangke sa butane usa ka disposable nga matang busa bisan kun butane ra usab ang itubil niini dili gayud mahimo.
Gidesinyo ang lata kon tangke sa butane nga gabok ug dali kaayo mohungaw busa delikado gyud kun gamiton kini sa makadaghang higayon, sumala ni Labios.
Hinuon iyang gihulagway nga mas bug-at ang epekto sa LPG itandi sa butane busa kun isulod kini sa tangke sa butane labing peligro.
Gani ang tangke sa LPG ug butane dako kaayo og kalainan tungod kay puthaw nga lig-on ang tangke sa LPG, panagana nga dili gyud mohungaw ang isulod niini.
Apan ang sa butane nipis kaayo tungod kay dili na man ipagamit sa ikaduhang higayon.
Kun may mogamit niini pag-usab nagkahulogan nga usa ka panurambaw ang maong buhat tungod kay dako kaayo kining supak sa balaod.
Hinuon matud pa ni Labios nga dinhi sa Sugbo wala pa kaayo mabaniog ang komon nga pagpatubil sa tangke sa butane ug LPG, kay ang anaa ra sa Lilioan maoy ilang nasayran nga nagbuhat sa ingon.
Giawhag lang ni Labios ang publiko nga kun may silingan kamo o kaila nga tigtubil sa tangke sa butane ug LPG ipataho dayon sa kapolisan aron nga masumpo ug kalikayan ang dako unyang hitabo sa sunog.
Samtang si regional chief Eulalio Muñez sa Bureau of Fire Protection (BFP)7 miingon nga sa mga sunog nga miigo sa Metro Cebu, wala pa sila makadawat og balita nga nagsukad sa butane.
Apan tungod kay basin mokompiyansa ang katawhan niini iya usab nga giawhag ang tanan nga magbantay nga walay mosuway niini aron nga kalikayan ang dagkong sunog sa palibot. (BANAT NEWS)