CEBU, Philippines - Subling gipadad-an og notisya sa Cebu Ports Authority (CPA) ang Bureau of Customs Port of Cebu aron papahawaon na sa ilang opisina sulod sa Cebu International Port (CIP).
Si CPA Gen. Manager Dennis Villamore sa iyang suwat ngadto sa BOC Port of Cebu subling mihangyo nga pabalhinon na sa laing dapit ang BOC office kay gamiton na nila ang kasamtangang opisina niini.
Kutob na lang karong katapusan sa bulan sa Agosto ang lugway nga gihatag sa CPA ngadto sa BOC aron sila makabalhin.
Kung magmagahi kini mapugos ang CPA sa paggamit sa parking lot sa BOC nga butangan og mga container vans aron dili na maghuot ang mga kargamento sud sa pantalan.
Gumikan niini nabalaka si Customs Cebu District Collector Edward dela Cuesta kung asa sila mopahiluna.
Apan usa sa ilang nahunahunaan ang pagbutang og tent sa Plaza Independencia nga maoy ilang temporaryong opisina, ang Malacañang sa Sugbu maoy karaang opisina sa BOC apan lalisunon pa kini gumikan sa panag-ilog sa Cebu City ug sa BOC sa maong edipisyo.
Ang eviction notice sa CPA ngadto sa BOC gihatag niadto pang si Atty. Ronnie Silvestre pa maoy district collector.
Si kanhi Customs Deputy Commissioner for Administration Jorenz Tañada misaad nga gahinan niini og P800 mil ang BOC-Cebu aron makabalhin kini og laing opisina apan hangtod karon wala pa kini mahatagi og pagtagad sa Department of Budget and Management o DBM. (/EIM) (BANAT NEWS)