CEBU, Philippines - Si Konsehal Nestor Archival nagtuo nga naguba sa kilat ang dako nga transformer sa Visayan Electric Company (VECO) didto sa Banilad tungod kay dili na g’yud epektibo ang ilang gitaud nga “lightning arresters.â€
Tungod sa pagkaguba sa dako nga transformer sa Veco nga maoy pundohanan sa kuryente nga gisabwag sa kanait nga mga dapit sama sa Mandaue, Talamban ug daghan pa’ng lugar, migasto ang Veco og subra sa P34.2 milyones.
Kini maoy hinungdan nga ang Veco gusto nga ipasa ngadto sa kaliboan niini ka konsumidor sa kuryente ang pagbayad sa maong kantidad sulod sa tulo ka buwan.
Ang matag konsumidor sa kuryente magbayad og dugang singko sentimos sa matag kilowatt-hour nga kuryente.
Nagpasabot nga kun ang usa ka tawo mokunsumo og 200 nga kuryente sa usa ka buwan, makabayad siya og dugang P13 apil na ang Value Added Tax.
Giangkon ni Lyndon Jayme, Assistant vice president sa VECO alang sa utility ug economic, nga ang lightning arresters nga gigamit nila ,napalit nga segunda-mano gikan sa National Grid Corporation of the Philippines kaniadtong 2008.
Matud ni Konsehal Archival nga kun bag-o pa ang lightning arresters nga gigamit sa VECO hayan dili makalusot ang kilat ngadto sa ilang mga transformers.
Ang lightning arresters maoy mopugong nga kun adunay kilat dili kini makadatum sa mga mahalon nila nga kahimanan. (BANAT NEWS)