CEBU, Philippines - Gipapriso sa bana ang iyang asawa human tuyoa niini og sunog ang ilang balay didto sa Sitio Balanghoy, Brgy. Gun-ob dakbayan sa Lapulapu kagahapon sa kadlawon.
Ang gipriso mao si Lycelle Dayanan, 34 , dalaga nga adunay kapuyo ug residente sa maong dapit.
Matud pa ni Eduardo Mangubat ang kapuyo ni Dayanan nga nagkalalis sila sa sayo pa.
Apan dihang natulog na kini uban sa ilang duha ka mga anak, mibangon ang suspetsado sa mga alas 2:20 sa kaadlawon ug gidusliban og pusporo ang ilang pultahan.
Matud pa ni Mangubat nga napugwat siya sa kakuyaw kay nagkayo na ang ilang pultahan.
Nakita ni Mangubat nga si Dayanan ang miduslit niini sa wala’y igong hinungdan.
Luyo sa kalisang nga maabo ang ilang balay, nanlimbasog si Mangubat sa pagpawong sa kayo hinungdan nga wala maugdaw sa hingpit ang ilang panimalay.
Gumikan niini gipadakop sa kapolisan ni Mangubat ang iyang kapuyo ug anaa karon gibilanggo sa Lapulapu City police detention cell.
Matud pa ni Mangubat nga mopasaka siya og kaso batok ni Dayanan.
Gawas niini nakahukom usab siyang makigbulag gumikan sa pagkapalahubog niini unya siya’y kulatahon.
Miingon si Mangubat nga mas maayo ra nga wala sila makasal aron wala siya’y dakong obligasyon sa maong babaye.
Kasong arson ang posibleng ipasaka sa kapolisan batok ni Dayanan nga kasamtangang anaa sa detention cell. (BANAT NEWS)