CEBU, Philippines - Usa ka gipasanginlang mangingilad ang nasikop samtang nakaikyas ang kauban niini human misinggit ang usa ka ginang nga siya giilad sa mga suspetsado sud sa iyang panimay diha sa barangay Tabok sa dakbayan sa Mandaue niadtong Huwebes sa buntag .
Si Jaime Pingkian, 46, nga taga Dawis, Bohol ang nakulatahan sa mga estambay una gi-turnover sa kapolisan human misiyagit ug nagpakitabang si Francisca Cabigas,50, human niya masaksihi nga giilisan sa mga suspetsado ang iyang bulawang singsing og peke nga singsing bulawan.
Matud pa sa biktima nga ang mga suspetsado miadto sa iyang panimay ug nangutana kun aduna ba siya’y ipaayo nga gubang mga bulawan nga alahas ug siya mitando ug gipakita ngadto kanila ang iyang bulawan nga singsing nga adunay diamante nga nagkantidad og P5 mil.
Apan natingala siya nga gitunaw sa mga suspetsado ang iyang singsing ug paghuman giilisan kini og peke nga bulawan hinungdan sa iyang kalagot ug nangayo og tabang sa mga silingan.
Ang suspetsado gidala sa Basak Police Station apan nakaipsot ang iyang kauban. (/EIM) (BANAT NEWS)