CEBU, Philippines - Madawat sa mga opisyal ug kawani sa kagamhanan sa dakbayan sa Mandaue ang ilang anniversary bunos karong Agosto 30, 2013 atol sa ika-44 nga charter day anniversary sa siyudad.
Ang maong mga kawani naglakip sa regular, casual, job order ug mga clean and green kinsa nagtrabaho sa maong dakbayan.
Nasayran nga ang maong dakbayan nadeklarar isip Charter City niadtong Agosto 30, 1969 sa panahon pa ni anhing Presidente Ferdinand Marcos pinaagi sa Presidential Decree No. 586. Si Konsehal Diosdado Suico nga maoy executive chairman sa kalihokan sa maong kasaulogan karong tuiga maoy mibutyag niini atol sa press conference didto sa Insular Square Center sa barangay Basak sa maong dakbayan kagahapon.
Matud pa ni Konsehal Suico nga anaa na sa final reading nila sa ilang regular session ang ordinansa nga maoy maghatag og pagtugot kang Mayor Jonas Cortes sa pagpagawas og gahin alang sa anniversary bonus sa mga kawani karong tuiga.
Hinuon si Suico miingon nga wala pa nila matino ang kantidad nga madawat sa mga kawani apan iyang gipaniguro nga nalakip kini sa ilang gigahinan og salapi alang sa maong kasaulogan karong tuiga.
Si Konsehal Suico miingon nga may P5 milyones nga kantidad nga gitakdang gamiton sa gastohanan alang sa mga kalihokan nga molungtad og usa ka bulan.
Naglakip sa gihan-ay nga mga kalihokan nga himoon sa adlaw o gabii mao ang food festival and trade fair, cultural competition nga naglakip sa indigay sa kanta, sayaw ug uban pa. Ang Mandaue Chamber of Commerce and Industry (MCCI) nga nagsaulog usab sa business month sa maong bulan, nahilakip usab sa mga nahan-ay nga kalihokan.
Aduna pay Mandaue anti dengue day, surgical and dental mission ug business seminar ug uban pa. (/WC) (BANAT NEWS)