CEBU, Philippines - Ang mga opisyal sa kabarangayan dinhi sa Sugbo giawhag sa mga konsehal sa dakbayan nga motabang sa kapolisan pag-ila kinsa ang nagpaluyo sa illegal nga sugal sa ilang tagsa-tagsa ka dapit.
Matud ni Konsehal Ritchie Osmeña, tsirman sa Committee on Public Order and Safety, nga sigurado siya nga masumpo gayud ang illegal nga sugal kun moabag lang ang mga opisyal sa kabarangayan.
Giaprobahan sa Cebu City Council ang sugyot ni Osmeña nga gipaagi sa resolusyon nga ang mga opisyal sa barangay nga magmika lang ug dili mohimo’g lakang batok sa illegal nga sugal silotan.
Ang Republic Act 9287 mao ang balaud nga nagpataas sa silot batok sa mga tawo nga nalambigit sa “illegal numbers game†sama sa masiao nga wala gayud mapuo.
Ang kalihukan sa video karera maisip usab nga kabahin sa gitawag og illegal numbers game sanglit kombinasyon sa numero ang daugan sa mga mamusta sa maong matang sa sugal.
Sumala pa ni Osmeña nga ang mga opisyal sa kabarangayan angay’ng mohimo dayon og imbistigasyon aron mahibaw-an nila ang mga tawo nga nalambigit sa kalihukan sa mga tigpasiugda sa sugal.
Dinhi sa dakbayan sa Sugbo wala malilong sa kapolisan bahin sa nagpaluyo sa mga illegal nga sugal sama sa masiao ug video karera. WC (BANAT NEWS)