CEBU, Philippines - Nagtingkagol karon sa karsel ang gipasanginlang financier ug ingon man ang 24 niini ka mga sakop atol sa gihimong operasyon sa Provincial Intelligence Branch sa nagkadaiyang barangay sa dakbayan sa Toledo kagahapon sa kaadlawon.
Ang mga nasikop mao si Timoteo Largo kinsa giingong anaa sa PIB watchlist nga bigtime financier sa ilegal nga sugal sa maong dakbayan.
Samtang gironda usab ang giingong iyang mga coordinators ug ushers diha sa barangay DAS mao silang Matias Caburnay, Jade Talaugon, Joselito Caburnay, Roldan Secretarya ug Eric Secretarya.
Samtang nasikop usab sa barangay Kambang-ag mao silang Jerrymel Largo, Clair Ann Bacalso, Marlinda Alquisa, Marieta Dandero, Apolinario Jimenez, Ken Abellanosa Fredie Villarin, Clitton Caño, Amay Talandon, Patrick Barcenas, Jovanni Gallera, Ivan Misa, Mark Repaso, Nulo Abalde, Edgar Villarin, Marvin Sigaran, Dionisio Bitoon ug laing duha ka menor de edad.
Sa pakighinabi sa Banat News ni Chief Insp. Rodolfo Albotra dugay na silang naniid sa kalihokan ni Largo human sila makadawat og impormasyon gikan sa mga concerned citizen bahin sa operasyon niini.
Gitug-an usab ni Albotra nga bag-ohay pa lang sa maong kalihukan si Largo apan dako na kaayo kini og lugar nga ginsakupan.
Narekober sa kapolisan ang mga kahimanan sa illegal nga sugal. Lakip usab niini mao ang duha ka motorsiklo nga gituohang maoy gamiton sa pagkolekta ug paghatud sa ilang mga tally sheets.
Dili momenus P15 mil nga cash nga gituohang halin sa illegal nga sugal ang nasakmit sa mga operatiba. (/EIM) (BANAT NEWS)