CEBU, Philippines - Giaresto sa mga sakop sa Regional Intelligence Division ug Regional Special Operations Group ang usa ka lalaking imbitaron lang unta aron ipaubos sa pipila ka mga pangutana kalabot sa kamatayon sa police asset niadtong milabay’ng semana.
Si Nelson Leng, 42, molupyo sa dalan Tres de Abril sa barangay Labangon ang nasikop sa kapolisan human makuhai og armas ug granada.
Matud pa ni Deputy chief for operations, Insp. Romeo Sentinta nga dihang ilang giadto ang panimalay ni Leng aron imbitahon aron pangutan-on kabahin sa kamatayon sa police asset nga si Neil Gabutin nga gipatay niadtong Hulyo 20.
Apan dihang nakit-an sila ni Leng giingong misuway kini sa pagbunot sa iyang armas sa iyang kilid hinungdan nga kini gipugngan.
Atol sa pagrekisa nakuhaan kini og usa ka armas ug usa ka granada diha sa bulsa.
Si Leng mihimakak og kalambigitan sa pagpatay sa maong police informant tungod kay didto ra siya sa ilaha natulog atol sa pagkahitabo. EIM (BANAT NEWS)