CEBU, Philippines - Mahibaw-an na gilayon sa kapolisan ang mga panghitabo sa kadalanan nga naglakip sa pagpanulis, pagpangilad, pagpanglabni ug ingon man ang mga aksidente sa sakyanan sa dakbayan sa Mandaue.
Kini kun mahinayon ang pagpamutang sa mga CCTV camera nga gitinguha sa kagamhanan nga gitumong usab alang sa paghatag og dugang pa nga kahapsay sa dagan sa mga sakyanan sa kadalanan.
Sa miaging adlaw, gisugdan na sa kompanyang maoy gitahasang momuntar sa mga closed-circuit television camera ang mga kadalanan sa dakbayan nga maoy butangan niini.
Gimando na ni Mayor Jonas Cortes sa mga nagdumala sa nagkadaiyang establisamento sa pagtangtang gilayon ug ipahimutang ang nagkatuali nga mga kable nila sa kuryente aron dili masalipdan ang mga CCTV camera nga ipahimutang uban usab sa bag-ong mga traffic light nga gipalit sa kagamhanan.
Si Edwin Ermac nga maoy head sa Traffic Enforcement Agency of Mandaue (TEAM) miingon nga pinaagi sa CCTV cameras mamonitor nila ang traffic gikan sa ilang Bantay Command Center diha sa ilang buhatan. (BANAT NEWS)