Ika-4 nga rice processing center nadawat na

CEBU, Philippines - Nadawat  sa Pilipinas ang ika upat ug katapusang Rice Processing Center (RPC) gikan sa Korea International Corporation Agency (KOICA).

Kini  mao  ang mga RPC alang sa Sinaragan, Matanao, Davao del Sur nga  nadawat sa Buhatan sa Agrikultura niadtong Hulyo 19, 2013.

Matud pa ni Rex Bingabing, Executive Director sa Dept. of Agriculture-Philippine Center for Post Harvest Development & Mechanization nga ang maong kahimanan sa panguma usa ka dakung tabang aron mamenusan ang alakanse sa mga mag-uuma sa maong probinsya.

Ang upat ka mga RPC nga nahatagan og pundo gikan sa KOICA usa sa labing modern nga rice processing facilities sa tibuok nasud.

Tungod niini mapasalamaton ang gobyerno sa Pilipinas sa tabang gikan sa gobyerno sa Korea.

Ang KOICA midonar na sa mikabat sa P649 milyones sa upat ka mga RPC samtang ang gobyerno sa Pilipinas mihatag usab og counterpart nga P136.45 milyon.

Ang maong RPC adunay lima ka mechanical dryers, multi-pass state of the art milling facility nga adunay color sorter, length grader ug automatic bagger.

Ang usa ka 5-unit nga mechanical dryer maka-harvest og 50 ka tonelada o balor og usa ka libo ka sako nga  tipasi sa matag  adlaw .

Ang storage facility niini mapundohan og 22,000 ka sako nga bugas.

Sa nasayran,gihimo  dili pa dugay  ang ceremonial turn over sa RPC didto sa Pilar, Bohol.

Ang  maong  kalihokan gihangop  pag-ayo sa mga mag-uuma sa maong dapit ug nga mapasigarbohon usab sila niining maong matang nga kalihokan.

Gituohan nila  nga usa  kini  sa makahatag og dakong tampo aron  ang  nasud mahimong usa sa mga rice producing country sa tibuok kalibotan. (/WC) (BANAT NEWS)

Show comments