CEBU, Philippines - Bukas si Gob. Hilario Davide III nga mamahimong pangulo sa Central Visayas Regional Development Council (RDC) 7 nga gibakante ni Cebu City Mayor Michael Rama.
Hinoon si Davide miklaro nga wala sa iyang hunahuna ang maong butang ug si Rama pa lang ang iyang nahibaw-an nga interesado alang sa ikaduhang termino.
“If the President will consider me and will ask me to head the RDC, of course willing ta mo-serve as head sa RDC,†matud pang Davide.
Ang presidente lang ang motudlo sa mamahimong chairman ug vice chairman sa mga RDCs.
Sa tuig 2010-2013, si Presidenti Benigno Aquino III unang nitudlo sa namatay nga gobernador sa lalawigan sa Negros Oriental, Augustin Perdices, niadtong Disyembre 2, 2010 isip RDC 7 chairman samtang ang co-chairman si Argeo Melisimo, ang presidenti sa First Consolidated Bank in Bohol sa habig sa pribadong sektor.
Apan si Perdices namatay sa kanser sa tiyan niadtong Enero 5, 2011 sa wala pa siya nakahural isip RDC-7 chairman hinungdan nga niduso ang rehiyonal nga buhatan sa National Economic Development Authority 7 og laing mga nominado ngadto sa presidenti.Nalakip niini ang pangan ni Rama, Mandaue City Mayor Jonas Cortes ug ang mga gobernbador sa Cebu, Bohol ug Siquijor.Niadtong Marso 31, 2011, si Aquino nipili kang Rama kinsa iyang kaalyado sa Liberal Party niadtong panahona. Nangandoy gihapon si Rama sa katungdanan bisan dili na siya kaalyado sa Presidenti human siya nidagan niadtong Mayo 13 nga eleksiyon ubos sa United Nationalist Alliance (UNA).
Si Davide nga kaalyado ni Aquino sa LP wala usab nagtinguha og taas nga pwesto sa League of Provinces of the Philippines (LPP) diin napili lang siya nga board member at large kauban ni Mindoro Oriental Gob. Alfonso Umali isip national president sa eleksiyon niadtong Biyernes. (BANAT NEWS)