CEBU, Philippines - Duha ka mga menor de edad ang nasalbar sa mga sakop sa Regional Anti- Human Trafficking Task Force nga gibikima sa mga human traffickers didto sa sitio Calaugan Tibiao, sa Antique.
Nasikop usab ang usa ka gipasanginlang maoy mibugaw kanila atol sa entrapment operation niadtong Domingo didto sa maong dapit.
Nasikop sa kapolisan mao si Virginia Maat Amar, 51, molupyo sa maong dapit ug giingong tag-iya sa usa ka beach resort ug lodging house sa maong probinsya.
Ang kapolisan sa RHTTF-7 nakadawat og taho gikan sa Mandaue Social Welfare nga adunay duha ka menor de edad nga nabiktima sa human trafficking nga gidala didto sa maong probinsya.
Atol sa entrapment operation, ilang gibayran ang duha ka bata sa balor nga P3 mil ug tuod man dihang gidawat na ni Maat ang kwarta dali kining gisikop. Taga Mandaue City ang 14-anyos samtang usa usab niini nga nagpangidarun og 17-anyos molupyo sa dakbayan sa Danao.
Matod pa sa deputy chief sa RAHTTF Insp. Sheryl Bautista nga ila karun nga gipangita ang nag-recruit sa duha nga giingong maoy misaad sa mga bata nga sila patrabahuon isip tigbantay og bata apan lahi na diay ang trabaho nga ilang gidad-an.
Dugang pa ni Bautista nga gibaligya ang biktima sa kantidad nga P1,500 ngadto na sa P1,700 kada kustomer nga mogamit kanila sa pakighilawas.
Ang dinakpan mipadayag usab nga kadto lamang higayona siya mibaligya sa duha kay buot niyang matabangan sila nga makatigom aron ikapalit og tiket pauli sa Sugbu. Dugang pa ni Amar nga ang duha ka biktima igo lamang nga nag-abang sa ilang lodging house ug nagtrabaho kini sa usa ka bar ug wala niya sila pugngi sa pagtrabaho sa bar tungod kay gusto man silang makatigom og pamelete pauli sa Sugbo.
Kasong kalapasan sa RA 10364 kon Expanded Trafficking in Persons Act of 2012 ngadto na sa korte sa dakbayan sa Mandaue.
Ang Children’s Legal Bureau mihingusog karon sa ilang kampanya batok sa human trafficking nga naglambigit sa child sex tourism dinhi sa Sugbo.
Si Atty. Noeime Truya usa sa mga opisyal sa CLB mibutyag nga daghan na karong mga kaso sa mga langyaw nga ang target mao ang kabataan dinhi sa Sugbu.
Pipila niining gitawag nga mga pedophiles nadakpan na dinhi sa siyudad sa mga sakop sa National Bureau of Investigation, ang duha Canadian national ug usa ka Australian nga nasakpang migamit og mga bata sa ilang pakighilawas bugti sa bayad.
Duna say mga ginikanan nga mismong ilang mga anak maoy ilang gitukmod sa cyber sex aron mokita og dolyares.
Tungod niini, gipakusgan sa CLB ang kampanya pinaagi sa pag-edukar sa kabataan ug mga ginikanan kabahin sa maong problema.
Usa sa mga nakitang pasangil sa mga bata ug mga ginikanan nga nalambigit sa child pornography mao ang kakabus. Ang mga pamilyang nalambigit sa child pornography sa lungsod sa Cordova walay mga desenteng trabaho.
Samtang nasuta usab sa CLB nga bisan ang kabataan nga nalambigit sa prostitusyon mipasangil nga ang kakabus gihapon maoy nakadani kanila pagsulod sa maong matang sa trabaho. (BANAT NEWS)