CEBU, Philippines -Usa ka pista opisyal sa tibuok lalawigan sa Bohol tibuok adlaw kagahapon. Walay trabaho ug walay klase sa maong probinsya tungod kay ang Hulyo 22 gideklarar nga Bohol Day alang sa mga Bol-anon.
Kahinumdoman nga sa Hulyo 22, 1854, nakabaton og kaugalingnan ang Bohol kauban ang Siquijor dihang gideklarar kining nabuwag na sa lalawigan sa Sugbo.
Pinaagi usab sa Republic Act 7683, gideklarar na sa Kongreso nga Special Holiday sa tibuok Bohol ug sa syudad sa Tagbilaran ang Hulyo 22 matag tuig. Gipangunahan sa Kagamhanang Probinsyal ang mga kalihokan sa pagsaulog sa ika-159 nga sumad sa Bohol.
Pipila sa mga kalihukan naglakip sa usa ka pasunding o ang Agri-Fair Motorcade sa mga nag-unang dalan sa dakbayan sa Tagbilaran.
Dayon gipangunahan ni Gob. Edgar Chatto ug mga kadagkuan sa kagamhanang probinsyal ang Foyer Honor, Wreath Laying ug pag-isa sa nasudnon ug probinsyal nga bandila sa Plaza Rizal.
Gisundan usab sa Ribbon Cutting ug pagbukas sa Sandugo Agri-Fair 2013 diin kapin 20 ka mga lungsod ug pundok ang mipasundayag sa ilang mga produkto sa agrikultura.
Usa ka programa isip paghandum sa kasaulogan ang gihimo didto sa Bohol Cultural Center nga gitambongan sa mga kawani sa national, provincial ug lokal nga kagamhanan, mga estudyante ug mga magtutudlo.
Parte sa programa ang pagpanghatag og pasidungog sa mga napiling Bol-anon ug langyaw isip pag-ila sa ilang kontribusyon alang sa pag-ugmad sa lalawigan sa Bohol nga base na usab sa ilang abilidad ug kahanas nga nakahatag og dungog sa Bohol. Gipangunahan usab ni Gob. Chatto ang pagbukas sa KISAME, usa ka Art Exhibit nga didto ipahigayon sa Bohol Museum. (/WC) (BANAT NEWS)