CEBU, Philippines - Minilyon kantidad sa gidudahang shabu ang nasakmit sa mga sakop sa City Intelligence Branch gikan sa usa ka gidudahang drug courier kagahapon sa kaadlawon diha sa sitio Buwaran sa barangay Sawang Calero, Cebu City.
Ang nasikop nailhan nga si Roger Roxas, 25, molupyo sa maong lugar ug giingong mangbubulad sa Tabo-an Public Market.
Ang hepe sa kapolisan sa City Intelligence Branch, Chief Inspector Romeo Santander mipadayag nga nakadawat sila og taho kalabot sa kalambigitan ni Roxas sa ginadiling drugas hinungdan nga ila kini nga gipaubos sa surveillance.
Dihang nakompirmar ug nagpositibo ang ilang pagduda gilusad dayon ang buy bust operation diin ilang gipalitan og balor P300,000 nga shabu si Roxas. Nahibulong hinuon si Santander tungod kay walay pagduha-duhang gidawat ni Roxas ang order ug mi-arrange dayon sa transaksyon. Human matunol ang maong ilegal nga drugas sa mga polis dali siyang gisikop.
Misuway pa unta siya sa pag-eskapo apan gumikan sa kahagip-ot sa iyang lugar napakyas kini ug nadakpan dayon.
Gibana-bana ni Santander nga mosobra sa usa ka kilo ang 26 ka dagkong putos nga gituohang shabu ang nakuha kang Roxas. Gibanabana usab nga moabot og P7.8 milyones ang abuton niini sa street value karong mga panahona.
Nagduda si Santander nga bag-ohay pa lang sa maong negosyo si Roxas sanglit wala kini malakip sa listahan sa mga drug personalities dinhi sa siyudad, gani dako ang pagtuo nilang courier o tighatud lang og drugas ang suspek ug aduna kini mas dakong agalon nga bigtime pusher.
Matud pa nga miangkon si Roxas nga “gitagak†lang kaniya ang maong shabu ug wala usab siya masayod kun diin kini gikan apan gipasaligan siyang hatagan og usa ka libo ka pesos nga komisyon kun mahalin kining tanan.
Gawas sa binultong shabu, nakuha usab ang usa ka kalibre .45 pistola nga adunay mga bala ug magazine gikan sa balay ni Roxas nga giingong giprenda lamang ngadto kaniya bugti sa usa ka paketeng shabu. (/EIM) (BANAT NEWS)