CEBU, Philippines - Nawagtang ang P5 mil ug mahinungdanong mga butang sa usa ka babaye nga pasahero sa traysikol human labniha ang iyang bag sa duha ka lalaki nga nagsakay og motorsiklo didto sa dalan Cabahug, barangay Guizo, dakbayan sa Mandaue sa miaging buntag.
Si PO2 Roldan Balimbing sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miila sa biktima nga mao si Maria Jamaica Baconguis, 21, dalaga nga taga sitio Calderohan,sa barangay Maguikay, sa maong dakbayan.
Matud pa ni PO2 Balimbing nga nagdagan subay sa dalan Cabahug sa barangay Guizo ang traysikol nga giluwanan sa biktima dihang ang motorsiklo sa duha ka wala hiilhing lalaki nagsunod kanila.
Dugang pa ni PO2 Balimbing nga tungod kay ang biktima naglingkod man sa luyo sa drayber wala kini makamatngon nga nakuptan sa backrider sa motor ang kawo sa iyang shoulder bag.
Dihang kalit kining gikanlat, hapit mahug ang biktima sa karsada apan nakuha gayud ang iyang bag nga gisudlan niya sa P5 mil.
Gawas sa cash, didto usab ang cell phone, ATM card ug ID sa iyang gitrabahoan.
Si PO2 Balimbing miingon nga human masakiyo ang shoulder bag sa biktima mipabulhot ang duha ka snatcher sa ilang sakyanan paingon sa dakbayan sa Sugbo.
Padayong gipangita sa kapolisan ang maong mga snatcher. (BANAT NEWS)