CEBU, Philippines - Nasikop sa kapolisan ang usa ka notadong tulisan sa Barangay T. Padilla ,dakbayan sa Sugbo sa akto nga nagbitbit kini og armas de fuego sa miaging Sabado sa gabii .
Si Julius Huerte Maambong, 33, nga taga dalan T. Padilla nasakmitan og .38 nga revolver nga adunay tulo ka buhing bala ug lakip na sa lima ka putos nga ginadiling drugas.
Si Chief Insp. Wildemar Tiu, hepe sa Waterfront Police Station, mibutyag nga kasagarang biktimahon ni Maambong mao ang mga pasaheroang jeepney sa may reclamation area.
Gani pito na ka mga biktima sa maong suspek ang nagpa-blotter sa ilang buhatan sukad niadtong Hunyo ning tuiga, hangtod karon.
Apan sa miaging Sabado sa gabii nasikop nila ang maong suspek, tungod sa tawag sa telepono sa usa ka concerned citizen kinsa nakakita nga armado ang maong suspek. Gisuwayan unta ni Maambong sa pagsalibay ang iyang armas apan nakit-an kini sa kapolisan.
Dihang girekisa kini, nasakmit sa kapolisan ang lima ka gagmay’ng pakete sa shabu gikan sa bulsa niini.
Si Tiu miawhag sa ubang nabiktima sa tulis sa may reclamation area sa pag-adto sa ilang buhatan aron makasang-at usab og kaso batok sa maong suspek. Kasong robbery, illegal nga paghupot og armas de fuego maoy ipasaka sa kapolisan batok kang Maambong. (/WC) (BANAT NEWS)