CEBU, Philippines - Patay ang usa ka 42-anyos nga mag-uuma human naputos og tinigbasan sa kalawasan ug sa ulo dihang giatake sa iyang kainom nga iyang gibaharang patyon dihang silang duha nangahubog na didto sa Sityo Lutak barangay Guiwanon lungsod sa Ginatilan niadtong Biyernes sa alas 4:58 sa hapon.
Ang biktima mao si Edwin Cardiente,42 anyos, minyo, nagpuyo sa maong lugar ug usa ka mag-uuma. Samtang ang suspek mao si Efren Bilagantol, 40 anyos, ulitawo ug molupyo usab sa maong lugar. Matud ni PO2 Meric Pampilo sa Ginatilan Police Station dihang nahinabi sa Banat News ang biktima ug ang suspek nag-inom sa wala pa ang hitabo ug dihang nangahubog na nagpasingitay sila og estorya.
Niabot sa punto nga nagkasabot kini nga magkaratihay apan napildi human maigo sa mga kumo ug patid ang biktima maong nasuko kini kay daw gitinuod na sa suspek ang ilang panagharongay maong mipauli kini ug mibahad nga balikan ang suspek kay iyang patyon.
Apan tungod kay mas duol og pinuy-anan ang suspek mas nakauna kini og sud sa iyang balay ug mikuha og sundang ug gigukod ang biktima ug diretso og tagod pagtigbas sa lawas ug ulo niini hangtud nga natumba.
Ang suspek nadakpan hinoon sa mga polis nga nirespondi sa alarma samtang ang biktima gidali og hatud sa Malabuyoc District Hospital apan gideklarar sa mga doktor nga patay na tungod sa kadaghan sa iyang samad.
Gituohan sa kapulisan nga dunay personal nga bangi kaniadto pa ang biktima ug ang suspek nga nabanhaw atol sa ilang inom nga maoy nakaingon sa krimen. (BANAT NEWS)