CEBU, Philippines - Gibutangan na sa Kapitolyo og estambayanan ang mga piniriso gikan sa husay sa ilang kaso sa Palasyo sa Hustisya samtang magpaabot sa sakyanan nga mohatud kanila balik sa bilanggoan.
Matud pa sa chief security officer sa Kapitolyo, Loy Anthony Madrigal, nga kabahin kini sa ilang paghatag og seguridad sa mga piniriso batok niadtong magtinguha og dautan.
Sa ingon niini, matud pa ni Madrigal nga mapugngan usab ang kabanay sa mga piniriso nga mohatag og bisan unsa nga gidili ngadto kanila nga madala balik sa prisohan.
Ang mga piniriso sa Cebu City Jail ug Cebu Provincial Detention and Rehabilitation Center ang makagamit sa maong lugar.
Namatikdan nga ang mga pinusasan nga mga piniriso anha lang sa daplin–daplin nga bantayan sa mga gwardiya samtang magpaabot sa ilang sakyanan.
Samtang anaa sulod sa holding area, wala nay makapaduol nga bisan kinsa sa mga piniriso sumala pa ni Madrigal.
Gipasabot ni Madrigal nga adunay gitakda nga adlaw ug oras sa mga kabanay sa mga piniriso nga makabisita sa bilanggoan ug ang pagdala kanila sa korte mao lang ang paghusay sa ilang kaso.
Usa ka bakanteng bodega ang gihimong estambayanan sa mga piniriso luyo sa Kapitolyo nga atbang ra usab sa Palasyo sa Hustisya.
Kini adunay electric fan, lingkuranan ug suga ug makaigo og 15 ka tawo ang sulod niini.
Tupad sa maong lugar mao ang buhatan sa Civil Security Services Division nga mahimo usab nga gamiton nga estambayanan sa higayon nga dili na makaarang ang mga piniriso sa holding area. (Gregg M. Rubio/WC) (BANAT NEWS)