CEBU, Philippines - Usa ka polis ang gikombikto ni Judge Gilbert Moises sa kasong serious physical injuries tungod sa giingong paggamit niini og sobrang pwersa sa usa ka sibilyan nga iyang dakpunon diha sa dakbayan sa Talisay niadtong tuig 2006.
Si PO3 Porferio Lim kinsa gikiha og serious physical injuries sa usa ka Anselmo Abano niadtong tuig 2006 didto sa siyudad sa Talisay ipapriso sud sa usa ka buwan ug usa ka adlaw human nakita ni Moises nga dunay igong basehan sa pagsilot kaniya.
Ang pagpangulata giingong nahitabo niadtong Disyembre 11, 2006, sa usa ka Martin Paran nga taga Talisay City nagkanayon nga nakakita siya sa pagdagmal ni Lim kang Abano samtang siya namisbis sa iyang mga tanom.
Matud niya nakita niya si Lim nga gigukod si Abano samtang nagpunay og singgit ang polis og ‘kawatan’ maong miapil siya sa paggukod kang Abano.
Sumala pa niya naigo sa tiyan, kilid ug tuong paa si Abano apan nakaipsot human nakasulod sa kabalayan.
Ang akusado nagkanayon nga nakadawat siya’g taho nanglugos ug gikawatan ni Abano ang iyang ig-agaw nga kanhi kapuyo usab sa iyang napusilan, apan dihang iya untang dakpon midagan kini maong nahitabo ang ginukdanay.
Apan matod ni Moises naghinobra ra ang pwersang gigamit ni Lim ilabi na ang paggamit niya og armas tungod kay di armado ang biktima. (Mylen Manto/EIM) (BANAT NEWS)