CEBU, Philippines - Pamilya sa 3-anyos nga batang nalumos ug mipasangil nga gipasagdan sa doctor sa Tuburan District Hospital midangop sa buhatan sa National Bureau of Investigation (NBI)-7 aron ipaimbestigar ang gidangatan sa bata.
Buot nilang paimbestigahan si Dr. Esteban Ligaray, ang hepe sa Tuburan District Hospital ug duha ka mga kawani sa maong tambalanan. Si Chris John Lidres, 3-anyos, taga Barangay Putat, Tuburan namatay niadtong Domingo sa alas 4:00 sa hapon tungod sa “cardiopulmonary arrest secondary to aspiration due to near drowning.†Ang laing duha nga gireklamo sa pamilyang Lidres mao ang attending physician nga si Dr. Jatupon Vatanagul ug ang nurse aide nga si Chito Chaluag.
Matud sa apohan sa bata nga si Mini Lidres hapit malumos sa dagat ang iyang apo samtang kuyog kining naligo sa iyang iyaan nga si Marianie Lidres ug gidali nilang gidala sa hospital sa alas-12 sa udto ug gisusi kini ni Dr. Vatanagul ug giingong mideklarar kini nga “safe†ra ang biktima. Gipasanginlan nila si Vatanagul nga mibiya kay natulog ug di magpa-istorbo.
Matud pa nga gipapaabot pa sila sud sa 30-minutos una pa migawas sa opisina si Vatanagul ug misusi sa bata ug kini miingon nga kritikal na ang bata, ang bata namatay pagkaalas-4 sa hapon. Apan si Dr. Ligaray mihimakak sa mga alegasyon sa pamilyang Lidres tungod kay giatiman ni Vatanagul ang bata, gani gitambagan pa niini ang ginikanan sa bata nga ihatud kini sa Cebu City hospital apan giingong sila maoy nagdumili pagtuman.(Mylen Manto/EIM)
Kombate sa lantugi sa sesyon sa Cebu City Hall gipaabot karong adlawa
Ni Rene U. Borromeo
Daku nga lantugi ang nagpaabot atol sa sesyon sa mga konsehal sa dakbayan sa Sugbo karong buntaga kun hisgutan na pagbalik ang pagpili og mga opisyal sa lainlaing komitiba sa Cebu City Council. Wala pa maaprobahi ang han-ay sa mga inandam nang pangalan nga mao unta ang molangkob sa 24 ka komitiba sa konseho ug ipadayon kini pagdiskutir karong buntag.
Ang mga sakop sa City Council Secretariat misukip na sa mga hisgutanan diha sa “calendar of activities†sa ikaduha nga sesyon sa mga sakop sa 13th City Council nga gipangulohan na ni Vice Mayor Edgardo Labella.
Sa miaging inaugural sesyon, gikwestyon ni Konsehal Maryann Delos Santos ang pagbasa ni Konsehal Margarita “Margot†Osmeña sa mga ngalan sa mga konsehal nga naglangkob sa mga chairman, vice chairman ug mga sakop sa matag komitiba.
Wala mahimuot si Delos Santos ug Tumulak nganong gihurot man sa BOPK ang posisyon sa komitiba ug duna pay nagsapaw-sapaw ang gidalang komitiba apan silang duha wala hatagi og higayon. (BANAT NEWS)