CEBU, Philippines - Ang kadagkoan sa Department of Environment and Natural Resources (DENR) mihulga nga sirad-an nila ang ihawan sa dakbayan sa Sugbo nga anaa sa North Reclamation Area kay nakalapas kini sa balaud.
Matud ni Dr. Pilar Romero, acting chief sa Department of Veterinary Medicine and Fisheries (DVMF), nga nakadawat sila og order sa DENR nga pasirad-an ang ihawan sa dakbayan kay ang hugaw direkta ra nga gipaagas sa sapa.
Si Dr. Romero nagkanayon nga sukad-masukad wala gayud mahitabo nga ang hugaw nga gikan sa ihawan ilang gipaagi sa water treatment facility nga maoy gilatid sa balaud.
Ang hugaw nga gikan sa mga inihaw nga kahayopan giderekta lang pagpaagos ngadto sa sapa nga anaa mag-agi sa kilid sa ihawan ug modagayday usab kini ngadto sa dagat.
Matud ni Dr. Romero nga makasinati sila og problema kun matak-opan gayud ang ihawan mao nga kanunay ra sila nga mihangyo sa DENR nga hatagan pa sila og lugway.
Si Mayor Michael Rama nagkanayon nga nahibulong siya kun nganong wala ipaagi sa water treatment facility duol sa ihawan ang hugaw gikan sa mga inihaw nga mananap.
Ang SM City mao ra ang giingon nga migamit sa water treatment facility nga anaa mahimutang pipila ka metros gikan sa ihawan sa dakbayan nga dili usab accredited sa National Meat Inspection Commission (NMIC).
Matud ni Mayor Rama nga iyang ipasusi kun unsaon pagpaagi nga ang hugaw gikan sa ihawan anha na mag-agi sa water treatment facility aron dili na makalapas sa balaud ang maong ihawan sa dakbayan.
Ang ihawan sa dakbayan nga moderno kaayo kaniadtong dekada 80, moihaw na lang og kapin sa 200 ka baboy sa usa ka adlaw, 65 ka dagkung hayop sama sa kabaw, baka ug kabayo, ingon man dili kaayo daghan nga mga kanding. (BANAT NEWS)