CEBU, Philippines - Ang Department of Social Welfare and Development (DSWD) 7 sa pagkakaron nangandam alang sa ipahigayon nila nga National Household Targeting System for Poverty Reduction (NHTS-PR)second round karong umaabot nga Septiyembre ning tuiga.
Gianunsyo ni DSWD-7 Regional Executive Director Mercedita Jabagat nga sugod karong Agusto ning tuiga, ang ilang buhatan mang-hire og 3, 471 ka field staff kinsa maoy mopahigayon og ebalwasyon sa mga kabos nga kabalayan sa rehiyon 7.
Ang ilang ma-hire motrabaho isip Area Coordinators, Area Supervisors, Enumerators, Verifiers ug usab Encoders.
Ang NHTS-PR nga assessment ipahigayon matag upat ka tuig.
Usa kini ka information management system nga maoy modeterminar kung si kinsa ug asa usab mahimutang ang mga kabos nga kabalayan sa nasud.
Sumala pa ni Kerwin Macopia, ang tigpamaba sa DSWD-7 nga ubos sa programa nga NHTS-PR , ang maong mga rekord nga makuha maoy basehanan sa mga nagkadaiyang ahensya sa gobiyerno lakip na sa non-government agencies ug civil society sa pagkuha sa ilang benepisyaryo.
Ang ilang mapili maoy makapahimus sa ilang mga programa sa proteksyon ug serbisyo.
Si NHTS-PR Regional Field Coordinator Ruben Boybanting miingon nga adunay pasiunang 869,000 hangtod 1,016,269 ang target nga kabos nga kabalayan nga pahigayonan og ebalwasyon sa tibook Central Visayas.
Dugang pa ni Boybanting nga human sa regular nga enumeration, mopahigayon sila og On-Demand Application (ODA) ug usab balidasyon sa mga makolektang datos.
Gipasabot ni Boybanting nga ang ODA ug ang balidasyon maoy duha ka dagko nga aktibidad nga gihimo karon.
Kini aron kasuportahan ang ebalwasyon ug usab kini maoy tubag sa mga isyu sa wala maatiman nga mga kabos nga kabalayan.
Kining maong proseso nagtumong sa pagsiguro sa integridad sa database sa dili pa kini ipaambit ngadto sa ubang ahensya sa gobiyerno ug magpapatigayon.
Gibutyag usab ni Boybanting nga ang tanang maila nga mga kabos nga kabalayan hatagan og Unified Multi-Purpose Identification Card. Ang NHTS-PR ning tuiga maoy ikaduha sa quadrennial nga ebalwasyon sa mga kabos nga kabalayan. (BANAT NEWS)