CEBU, Philippines - Dul-an sa 30 ka mga commercial sex workers ang na-rescue sa mga sakop sa Cebu City Police Office atol sa gipahigayon nila nga saturation drive sa nagkadaiyang lugar sa dakbayan sa Sugbo sa miaging gabii.
Ang mga lugar nga ilang gipangronda mao ang Kamagayan areas dapit sa Citilink, ug uptown areas sa dakbayan sa Sugbo.
Ang deputy chief sa Investigation and Detective Management Branch (IDMB) Insp. Arieza Otida, mipadayag nga mihimo sila sa maong pagpangronda uban sa pipila ka unit sa kapolisan sa CCPO, agi’g tubag sa mga reklamo nga ilang nadawat.
Matud pa ni Otida nga hilabihan na kadaghan sa mga reklamo kalabot sa mga commercial sex workers nga manghilabot og kabtangan sa ilang kustomer.
Dugang pa ni Otida nga ang modus sa mga pipila ka commercial workers mao nga kun ugaling ila na nga makuha ang kustomer ila dayon kini nga kuhaan sa mga cell phone ug uban pang mga gadgets.
Dihang gidala sa Police Station 2 holding area ang mga commercial sex workers duha ka babaye ang nagnilabnotay sa ilang buhok ug gani pipila usab kanila ang mitabang.
Si Roxan, (ngalan gipugngan) wala makadawat dihang giingnan siya ni Inday (ngalan gipugngan) nga usa ka ‘borekat’ hinungdan nga iya kini nga gibugno.
Apan maayo na lang kay dali kining naulang sa kapolisan ug gibuwag og butang ang duruha aron dili na magkagubot.
Samtang taliwala usab sa ilang pagpangronda, adunay usa ka 10-anyos nga batang lalaki ang nasikop sa kapolisan human kini gireklamo sa usa ka Jimmy Sinez kay nasakpan niya sulod sa iyang sakyanan.
Ila usab dayon kining gihatud ngadto sa buhatan sa Department of Social Welfare and Development. (/WC) (BANAT NEWS)