CEBU, Philippines - Duha ang namatay samtang usa ang angol tungod sa sugal nga hantak sa managlahi nga lugar ug oras sa dakbayan sa Sugbo kagahapon.
Ang namatay mao sila si Paulo Abellana Quidato, 32, taga sitio Riverside sa barangay Duljo- Fatima ug Ranil Luchavez Tampus, 24, nga taga Unit 3 Oprah barangay Kalunasan.
Samtang ang naangol mao si Leonardo Aracan Dayaganon, 57, nga taga barangay Kalunasan.
Pasado alas 5:00 sa miaging hapon, nahitabo ang pagpamusil sa Lower Oprah, barangay Kalunasan diin patay nang nahidangat sa tambalanan si Tampus samtang samaran usab si Dayaganon.
Sa inisyal nga imbestigasyon sa kapolisan nasayran nga ang biktima ug si Edward Bizmanos nag-away tungod sa desisyon sa ilang duwang hantak.
Apan sa pipila ka minutos sa maong away, duha na ka lanog sa buto sa armas ang nadunggan sa mga molupyo.
Human sa maong mga buto giingong maayong pagkahapla ngadto sa salog sa maong dapit ni Tampus kansang dughan naigo sa bala.
Samtang si Dayaganon nga nagtan-aw sa maong duwa nga nagbarog sa maong dapit, napagan usab ug nakaangkon kini og samad sa likod nga bahin sa iyang lawas.
Ang duha daling gidala sa Vicente Sotto Memorial Medical Center apan si Tampus gideklarar kini nga dead on arrival.
Samtang sa laing bahin, patay usab si Quidato human kini pusila sa wala hiilhing tawo pasado alas 2:00 kagahapon sa kaadlawon didto sa sitio Riverside barangay Duljo Fatima.
Ang biktima nagtan-aw og hantak sa maong dapit dihang kalit lang siya nga gipusil sa wala pa hiilhing kriminal.
Ang biktima namatay diha-diha dayon human kini maigo sa nagkadaiyang parti sa iyang lawas. Ang kapolisan nakakuha sa crime scene og 16 ka kabhang sa kalibre .45 samtang laing kabhang sa kalibre .9mm ug walo ka deformed slug sa susamang kalibre.
Ang kapolisan sa Homicide Section nagsuta pa karon kun unsa gayud ang hinungdan sa maong pagpamusil. (BANAT NEWS)