CEBU, Philippines - Nag-atubang og kasong criminal ang usa ka pulis nga nadestino sa Bantayan Police Station human gipasanginlang mipriso sa usa ka 19- anyos nga babayeng tinun-an diha sa karaang building sa munisipyo sa lungsod sa Sta. Fe.
Ang gikasuhan mao si PO1 George Gilbuela, nag-atubang og kasong serious illegal detention diha sa Cebu Provincial Prosecutor’s Office.
Sa affidavit, sa dalaga (pangalan gitago sa Banat News) nga taga Bantayan, mialegar nga gitanggong siya sa maong polis sukad pa niadtong Abril 5 nga milanat og usa ka semana.
Matud niya niadtong Abril 5, 2013 napugos siya pagkuyog ni Gilbuela tungod sa kahadlok sa mga hulga niini diha sa iyang text nga dunay dautang mahitabo sa iyang pamilya kung di siya mosugot nga magkita silang duha.
Si Gilbuela usa ka maestro sa usa ka kolehiyo diha sa Bantayan.
Niadtong higayuna sa alas 9:00 sa gabii, si Ybañez nagkanayon nga namisita kaniya ang maong polis apan wala niya kini atubanga kay sa iyang nahibaw-an dako kining minyo, ang iyang inahan ug igsuon maoy miatubang niini.
“I was afraid of him as he keeps on texting me and threatened to harm me, my family and my classmates as he was also our professor in Political Science and PE Crim III,†matud pa niya sa iyang affidavit.
Nadunggan na lang niya nga nananghid kini sa iyang inahan nga mouli na lang ug mobalik na lang ugma.
Apan bisan nakalakaw na kini nagsige kini og text kaniya ug mihulga nga “something will happen†sa iyang pamilya.
Tungod sa kahadlok sa buhaton sa maong polis, milakaw siya nga wala mananghid sa iyang inahan ug nakigkita siya kang Gilbuela.
Wala na siya’y nahimo tungod sa kahadlok dihang gitionan siya og armas ug giingnan nga “usa ra ni ka tira.†Gidala siya niini sa usa ka hotel sa Cebu City ug gibilin didto samtang adunay gilakaw ang maong polis sa Cebu Provincial Police Office.
Niadto nang Abril 12, 2013 na-rescue sa mga sakop sa Department of Social Welfare and Development ug uban pang mga ahensya sa gobiyerno ang dalaga human ma-trace nga didto siya gitanggong niini sa karaang building sa munisipyo sa Sta. Fe.
Ang inahan sa biktima nagkanayon nga niadtong Abril 5 sa gabii nahibulong siyang nahanaw ang iyang anak ug nianang pagkabuntag iyang gipangitaan si Gilbuela sa iyang anak apan mihimakak kini kay wala siya masayod kun asa kini.
Paglabay sa usa ka semana nakadawat siya’g impormasyon nga iyang anak gi-detain ni Gilbuela sa karaang building sa munisipyo sa Sta. Fe.
Hinungdan nga nangayo siya og tabang sa DSWD ug sa Bantayan Police Station ug didto ilang nasalbar ang dalaga.
Ang Banat News mitawag sa Bantayan Police Station aron pagkuha sa habig ni Gilbuela apan sumala pa sa nakatubag nga mibiyahe kini padung sa Cebu City, dihang gitawgan ang numero sa cellphone ni Gilbuela nga gihatag police station dili kini makontak. (Mylen Manto/EIM) (BANAT NEWS)