CEBU, Philippines - Gialarma na usab ang grupo sa Papua New Guinean human giingong nagkarambola sa usa ka imnanan diha sa Salinas Drive barangay Lahug dakbayan sa Sugbo kagahapon sa kaadlawon.
Upat ka mga Papuans ang gidakop nga mao sila si Ako Dick; Dowan Kilgue; Desmond Anglo ug Lamech Abel nga pulos mga tinun-an sa usa ka eskuylahan dinhi sa dakbayan.
Matud pa sa cashier sa G. Spot nga si Alfred Cariquitan nga adunay gikalalis ang usa sa mga Papuans ug gibadlong kini sa kauban apan nasuko hinuon ug sila na hinuoy nagkarambola.
Atol sa kagubot namato pa og mga botelya ang upat sa kabalayan duol sa maong imnanan. Human niini, mibalhin og laing imnanan ang grupo apan didto na sila gidakop sa mga polis.
Makadaghang higayon nang nalambigit sa kagubot ang maong mga langyaw dinhi sa Sugbu ning bulan sa Hunyo. (Lesley Caminade-Vestil/EIM) (BANAT NEWS)