CEBU, Philippines - Gihulagway nga susama sa mapiangan ang mga tulisan sa habagatang bahin sa Sugbo human masikop ang usa kanila ug napatay ang kauban niini nga maoy responsabli sa pipila ka mga dagkong pagpanulis sa Sugbo.
Ang hepe sa kapolisan sa lalawigan sa Sugbo Sr. Supt. Patrocinio Comendador mibutyag nga ang napatay sa shootout sa dakbayan sa Talisay niadtong Miyerkules sa kaadlawon maoy responsable sa mga pagpanulis sa habagatang bahin sa lalawigan.
Ang napatay nga si Marlou Caparida ug ang nadakpang si Sulpicio Tarde ug ang padayon pang gipangitang kauban sa grupo nga si Joel Generalao maoy gitumbok nga responsable sa pagtulis sa MLhuiller diha sa dakbayan sa Talisay niadtong Mayo 8 ug sa dakbayan sa Naga naidtong Hunyo 5.
Si Talisay Police Station chief, Supt. Elmer Lim miingon nga usa ka dakong grupo ang ilang gika-engkwentro “Kining grupo dako man gud ni sila og tirahon. Ma- minimize gyud na(tulis) kay mao man gud ni silang grupoha ang responsable pero ato na mang nabungkag," padayag pa ni Lim. (Lesley Caminade-Vestil/EIM) (BANAT NEWS)