CEBU, Philippines - Ang kagamhanan sa dakbayan sa Naga nagplanong mopatukod og Special Weapon and Tactic (SWAT) team pangandam kun adunay mga dagkung kagubot nga maghulga sa kahusay ug kalinaw sa siyudad.
Matud ni Mayor Valdemar Chiong nga nakig-istorya na siya kabahin sa maong plano ngadto sa hepe sa kapolisan sa probinsiya nga si Senior Superintendent Patrocinio Comendador.
Gibutyag ni Chiong nga ang kagamhanan sa Naga andam nga moabaga sa galastohan sa training sa pili-ong membro sa SWAT lakip na sa mga ekipo sama sa mga armas ug sakyanan.
Apan matud sa mayor nga kung aduna nay SWAT sa Naga kinahanglang sulod sa lima ka tuig kining madestino sa Naga ug dili dayon ibalhin ngadto sa laing unit.
Gipasabot ni Chiong nga ang pagbaton unya og SWAT sa Naga makatabang usab kini ngadto sa ubang silingang dakbayan sa Naga.
Gibutyag usab sa mayor nga ang Naga nagkinahanglan unta og kapin sa 70 ka mga polis apan karon 40 ra kapin ang mga polis sa dakbayan. (BANAT NEWS)