CEBU, Philippines - Usa sa mga responsable sa pagpangbanhig sa pamilyang Medina nailhan na sa kapolisan apan wala pa mohingalan niini.
Nasubay sa kapolisan ang tawong giingong maoy mi-abang sa sakyanang Vios ug Innova sa managlahing mga rent a car human sila makakuha og I.D. sa lugar diin kini magpuyo ug gipakita sa tag-iya sa mga nalambigit nga sakyanan.
Ang hepe sa kapolisan sa City Intelligence Branch Chief Insp. Romeo Santander, mipadayag nga ilang nasubay ang pinuy-anan sa suspek diin nila nakuha ang identification card.
Dugang pa ni Santander nga gawas niini, aduna usab silay gihuptang saksi nga nagbutyag kanila nga taud-taud nang nagpundo sa maong panimalay ang maong suspek.
Nakuha usab sa kapolisan ang mapa ug mga plano sa pagdagit sa pamilyang Medina. “We are contemplating everything, tanang informations at least malink-up nato,†padayag pa ni Santander.
Samtang ang hepe sa kapolisan sa dakbayan sa Sugbo, Sr. Supt. Mariano Natuel Jr. mipadayag nga base sa ilang obserbasyon sa mga impormasyong nakaylap dunay personal nga kasuko ang mga suspek sa mga Medina.
Matud pa ni Natuel nga ilang nakita nga kidnapping gyud ang tuyo sa grupo tungod usab sa iyang pagkanegosyanti ug ang iyang kalambigitan sa investment scam nga Aman Futures.
Hangtud ning pagsulat sa balita, wala pa gihapon mahinabi ni Natuel si Dr. Medina tungod kay mihangyo kini nga dili una moluwat og pamahayag.
“We invited him, pero hesitant pa siya nga moari sa office, and we have to give him time kay in trauma pa sila,†pasabot pa ni Natuel.
Ang magtiayong Medina lakip na ang ilang anak nga si Benjie ug bodyguard nga si Allan Dake gibabagan og duha ka sakyanan apan dihang mimaniobra pag-eskapo girakrakan kini sa mga lalaki diha sa Acacia St. Sacred Heart Banawa ning siyudad sa Sugbu Lunes sa gabii.
Ang hepe sa kapolisan sa Regional Intelligence Division Sr. Supt. Paul Labra mipadayag nga wala silay na-monitor nga grupo sa kidnap for ransom nga anaa karon sa syudad. (BANAT NEWS)