CEBU, Philippines - Patay nang napalgan ang usa ka Canadian national nga samdan sa agtang sa ikaduhang andana sa pension house nga iyang giabtan didto sa barangay Poblacion sa lungsod sa Barili kagahapon sa alas 9:10 sa buntag.
Ang langyaw mao si Richard Glen White, 44 , Canadian National ug adunay address nga 20114 Yongest, Holland Landing, Ontario, Canada.
Matud ni PO2 Glbert Encabo,desk officer sa Barili Police Station sa Banat News nga ang kawani sa Shamrock Pension House sa Poblacion, Barili nga si Belgin Camus, hingkod, maoy nanawag sa ilang buhatan.
Nangayo kini og police assistance human madiskubrehi niini nga ang ilang guest nga langyaw naglunang sa kaugalingong dugo nga may samad sa agtang. Sa pagrespondi sa kapolisan naabtan niini ang maong langyaw nga nagbuy-od sa agianan sa second floor sa maong pension house nga wala nay panimuot.
Dali nilang gitawagan si Dra. Mariejoy Bajarias, municipal health officer sa lungsod kinsa maoy mideklarar nini nga patay na. Nangayo usab og assistance ang kapolisan sa Crime Scene Investigation (CIS) sa Cebu Police Provincial Office (CPPO) ug gihulagway niini nga gibana-banang sa mga alas 6:00 hangtud sa alas 7:00 sa miaging gabii namatay ang maong langyaw.
Girekomendar pa nga ipaubos sa autopsy ang patay’ng lawas sa maong Canadian national nga gihaya karon sa Divine Mercy Funeral Homes sa maong lungsod aron mahibaw-an kun aduna bay foul play o aksidenti lang ang maong panghitabo.
Wala pa usay gipagawas nga resulta ang municipal health doctor sa tinuod nga hinungdan sa kamatayon sa maong langyaw tungod kay padayon pa ang ilang pagsusi niini. (/WC) (BANAT NEWS)