CEBU, Philippines - Nakadawat og mga relief assistance ang kapin sa 50 ka mga tag-iya og balay nga gikusokuso sa alimpus didto sa lungsod sa Minglanilla ug siyudad sa Talisay niadtong miaging Martes sa alas 2:30 sa hapon.
Miabot og 48 ang tanang mga balay nga nangaguba sa duha ka mga barangay sa Calajoan ug Tungkil sa lungsod sa Minglanilla, matud ni PO1 Wilmer Campo subay sa ilang record.
Samtang matud pa ni PO1 Paula Lumacang, desk officer sa Talisay City Police Station nga mikabat usab og 7 ka mga balay ang apektado sa alimpus sa barangay Mohon, siyudad sa Talisay ug dunay tulo ang mga naangol. Ang mga naangol mao sila si Marichu Panzano,30, wala pa matino ang pinuy-anan nga nagsakay og traysikol dihang naigo kini sa alimpus, Leticia Labada, 48, ug Rosie Sedetario, 35, apan dili kaayo seryoso ang mga samad nga ilang naangkon.
Si Felipa Solana sa Social Welfare Office sa dakbayan sa Talisay mitataw nga kagahapong adlawa ang mga tinugyanan sa Provincial Social Services Office nangapod-apod na og mga relief assistance sa mga pamilyang apektado nga langkoban sa bugas, banig ug gamit sa kusina. (BANAT NEWS)