CEBU, Philippines - Ang Ramon Aboitiz Foundation Inc. (RAFI) GREENIN Philippines Program nakig-abin sa Naga City ug lungsod sa Cordova isip nga manguna sa kalihokan sa Cebu ning tuiga atol sa Run 2 Plant 4 Greenin Philippines unya sa Hunyo 29.
Ang libre nga dagan ug sa samang higayon pagtanom og kahoy ipahigayon sa dungan nga paagi sa 43 ka lungsod ug mga dagkong siyudad sa lalawigan sa Sugbo.
Kadtong mga may kaikag nga mosalmot niini mahimong makig-alayon sa ilang tagsa-tagsa ka lokalidad .
Kadtong taga siyudad sa Sugbo adto moparehistro sa Naga o kaha sa Cordova.
Ang sentro nga kalihokan ning tuiga mosuporta sa kabungtoran sa Naga ug sa mga gasang sa Cordova.
Sa Naga, ang mga mosalmot modagan sa lima ka kilometro nga gilay-on gikan sa Naga City hall paingon ngadto sa 10 ektaryas nga tamnanan og kahoy nga mao ang barangay Tuyan. Gani sugdan ang pagpanglista sa alas 5:00 ang takna sa kabuntagon, samtang pabuthon ang armas sa pagsugod og dagan sa untop alas 6:00 sa buntag.
Samtang ang Cordova nga kalihokan magsugod gihapon sa alas 5:00 ang takna sa kabuntagon didto sa munisipyo sa maong lungsod samtang magsugod og dagan sa alas 6:00 sa kabuntagon.
Ang mga mosalmot sa dagan mopaingon ngadto sa dos ektaryas nga tamnanan og mga bakhaw diin mokabat sa 20 mill ka mga lubangon sa bakhaw ang giandam na nga ipananom.
Ang kabaybayonan ug kadagatan nasugamak sa kanihit na og ka-itlogan sa mga isda nga misangpot sa kadyutay na sa isda sa kadagatan karong panahona.
Ang pagpalabong usab sa mga bakhaw di lamang igo nga makapalabong sa kakahoyan sa daplin sa dagat apan makatabang sa pagpahiuli sa lugar alang sa kinabuhi sa mga isda sa maong mga dapit.
Ang taga RAFI modestino og mga coach nga mobantay sa mga mananom og kakahoyan sa maong higayon. (BANAT NEWS)