CEBU, Philippines - Gitan-aw karon ni Mayor Michael Rama nga nakahimo gayud og kalapasan sa balaod ang kadagkoan sa Camp Crame human nila gitudlo si Senior Superintendent Mariano Natuel Jr. nga director sa Cebu City Police Office (CCPO) bisan og wala pa malibkas ang Election Ban.
Ang mga sinaligan ni Mayor Rama nakakuha na kagahapon og kopya sa appointment ni Natu-el nga gipetsahan og Mayo 10 nga nag-promote sa iyang katungdanan gikan sa pagka acting city director ngadto na sa pagka city director.
Si Mayor Rama hinuon mitug-an nga atol sa press conference kagahapon wala pa niya mabasa ang kopya sa appointment papers ni Natu-el.
Sa appointment papers nga giisyu sa Police Regional Office-7 ug gipirmahan ni Senior Superintendent Noel Gillamac wala kini magbutyag sa “Cite Numbers†sa order sa Camp Crame nga maoy gibasihan nila pag-isyu og order ni Natu-el.
Gisuwayan unta sa pagkontak sa DYLA si Gillamac nga maoy hepe sa (R1) kon Personnel Section sa Police Regional Office-7, apan wala kini motubag.
Ang pagtudlo sa usa ka opisyal sa kapolisan sa mga dagkong pwesto dili mahimo kun wala mag-agi ug pag-uyon sa mga sakop sa Senior Officers Placement Board.
Si Rama miadto sa Camp Crame niadtong miaging semana ug mihangyo personal ni PNP Chief Allan Purisima nga si Senior Superintendent Noli Romana maoy itudlo nga direktor sa kapolisan sa dakbayan sa Sugbo kay mao kini ang girekomendar ni kanhi CCPO director Melvin Ramon Buenafe.
Apan ang wala mahibaw-i ni Rama nga si Romana gitudlo na usab nga full-pledged director sa Negros Oriental Provincial Police Office.
Matud ni Rama nga kun ang mga abogado sa dakbayan morekomendar nga pasakaan nila’g kaso ang kapolisan kay nakahimo kini’g kalapasan, mahimo nga iya kining himoon.
Wala hinoon magplano si Rama nga iyang putlan sa mga hinabang ang kapolisan gawas lang kun moingon sila nga wala magkinahanglan sa tabang sa City Hall sama sa mga sakyanan, gasolina, allowance sa polis ug uban pa. (/WC) (BANAT NEWS)