CEBU, Philippines - Patay diha-diha ang usa ka 13- anyos nga bata human kini mapusili sa usa ka barangay tanod adtong miaging adlaw mga 7:30 sa gabii sa Purok 7, Barangay Anopog, Pinamungajan.
Ang biktima nga si Jaddy Owakan, grade five pupil, nagduwa pa kini sa basketan dihang naabot ang suspek nga si Lolito Sebial, 47, ug kalit nga nagpasalba apan malas kay naigo ang liog sa biktima.
Matud ni SPO1 Peter Cuanso Jr., responding officer, nga si Owakan ug si Sebial gikan mitambong sa kasal sa ilang silingan dayon nagduwa ang bata sa basketan. Si Sebial milabay sa basketan dayong bunot sa .38 revolver ini dayong pabuto.
"Ambot lang pud kung unsay nasulod sa iyang huna-huna atong higayuna," matud ni Cuanso. Mi-surrender si Sebial sa barangay captain nga maoy mi-turn over kaniya sa kapulisan lakip na ang revolver niini nga adunay lima ka mga bala.
Gidala na sa Philippine National Police Crime Laboratory-7 sa Camp Sotero Cabahug sa Cebu City kagahapon sa buntag alang sa paraffin test.
Miadto na usab sa Firearms Explosives Security Services Agency and Guards Supervisory Section (FESSAGS) ang kapulisan alang sa pagsuta kung lisensiyado ba ang armas niini.
Kasong homicide may kalambigitan sa RA 7610 or Special Protection of Children Against Abuse, Exploitation and Discrimination Act ang ipasaka batok kang Sebial. (BANAT NEWS)