CEBU, Philippines - Dakung kausaban sa serbisyo sa mga terminal sa mga pantalan sa Sugbo masinati sa mga pasahero sa umaabot nga mga adlaw nunot sa mga proyekto karon nga gipatuman sa Cebu Ports Authority.
Ang mga plano ug mga proyekto sa CPA naglangkub sa pagpanindot sa pasilidad, pag-regulate sa porterage fees, ug paghapsay sa serbisyo sa transportasyon ug ayuda sa mga mosakay ug manaug nga mga pasahero.
Mismo ang mga opisyal sa Department of Tourism, Department of Trade and Industry ug National Economic Development Authority ang nakasaway sa serbisyo sa mga terminal ngadto sa mga pasahero ilabi na sa mga turista.
Hinungdan nga mihatag sila sa ilang mga sugyot atol sa gipahigayong tigum sa Economic Development Committee sa Regional Development Council 7 sa niaging semana.
Si NEDA 7 regional director Buenaventura Go-Soco Jr. miingon nga importante kaayo ang pag-atiman sa mga turista nga maoy daku og tabang sa pagsaka sa ekonomiya.
Usa ka Technical Working Group ang giumol aron pagpahigayon sa pagtoon ug gikatakda nga mopresentar sa ilang nahimo atol sa tigum sa RDC Full Council karong Huwebes.
Unang gitutukan sa TWG ang kahimtang sa mga pantalan sa dakbayan sa Sugbo.
Usa sa giduso mao nga sagupon sa CPA ang gihimo sa DOT nga nagtinabangay ug ang Cebu Tourist Transport Operators sa pagsuplay og mga taxi.
Nagplano ang DOT nga magbutang og sangang buhatan isip Visitor Welcome Center/Helpdesk apan ang CPA nangita pa og lugar diin ibutang ang maong pasilidad. (BANAT NEWS)