CEBU, Philippines - Gitinguha sa kagamhanan sa dakbayan sa Mandaue ang pagpalambo sa pag-ugnat sa kusog alang sa mga batan-on sa maong dakbayan. Pipila sa mga ginikanan sa maong dapit miuyon usab sa maong laraw alang sa pag-umol og batan-ong atleta.
Midugang si Mayor Jonas Cortes sa Mandaue nga ang tumong unta sa maong proyekto mao nga dili na magpasakop sa fraternity o paggamit sa illegal nga drugas ang mga batan-on sa Mandaue. Mahimo usab sila ikapadala ngadto sa Philippine National Game kansang kalampusan nga maangkon dakong garbo alang sa mga Mandauehanon.
Si Engineer Ricardo Mendoza nga maoy executive director sa Mandaue City Sports Commission nga nahinabi sa mga tigbalita miingon nga bisan kun bag-o pa nga gihingusgan sa pagpatuman ang maong programa sa kagamhanan apan sa unang higayon nga pag-apil sa Philippine National Game (PNG) niining tuiga, ang gipadala nilang atleta nakaangkon gilayon og kalampusan.
Dugang pa niya nga sa bag-o pa lang nga nahuman nga PNG nga gipasiugdahan sa Rizal Memorial Sports Complex sa Metro Manila maoy giapilan sa gipadala nilang mga atleta ang pag-indigay sa natad sa chess, table tennis, beach volleyball, karatedo ug arnis. Si Engineer Mendoza miingon nga sa chess ang atleta sa dakbayan nga si Diego Claro maoy nakaangkon og kadaugan ug nasakmit niini ang usa ka gold.
Sa dulang beach volleyball , nasakmit ang tulo ka mga silver nila ni Jade Becaldo, Mike Abria ug Avelino Suan, duha ka gold ang nasakmit nila ni Micha Boromeo ug Alyn Sabido.
Samtang bronze usab ang nasakmit , sa dula nga karatedo nila ni Alyn Sabido, Nina Baculao, Micha Boromeo, Gwen Ponteros, Levie Restauro, Criel Labrada, Kelvin Suan, April Marie Campo, Iresh Paacada ug Alexis Enad.
Dugang nasakmit nga gold sa dula nga arnis ug ang nakadawat niini mao sila si Donie Aguhub ug Dionie Pepito, samtang silver usab ang nasakmit nila ni Jude Gelig ug Jesriel Enguito ug bronze usab ang nasakmit nila ni Zeneth Paceble, John Daryl Dacalos ug Juliehar Barril. (/WC) (BANAT NEWS)