CEBU, Philippines - Mga 200 ka pamilya sa barangay Poblacion ug Cansojong ang gilunopan sukad pa niadtong Miyerkules sa gabii hangtud kagahapon tungod sa grabeng pagbunok sa uwan.
Si Fe Vergara, 61-anyos residente sa barangay Poblacion nagkanayon nga kada mouwan dili sila makapahuway og tarong tungod sa kabalakang mosaka ang tubig baha sama kaniadto nga miabot taga-hawak.
Matud ni Vergara nga nagsugod ang maong problema nila niadto pang tuig 1990 ug hangtud karon wala pa masulbad. Ang ubang mga residente sa Poblacion ug Cansojong mipasangil nga usa sa hinungdan sa grabeng baha diha sa ilang lugar mao ang factory sa bihon sa Cansojong nga giingong mopagawas sa ilang waste water atol sa ting-uwan.
Si Kagawad Edmund Villarante ug Gabriel Bonjoc sa Poblacion ang nangulo kagahapon sa pagpahinlo sa mga kanal diha sa ilang lugar.
Matud ni Villarante nga mga 200 ka pamilya sa Poblacion ug sa Cansojong boundary dapit sa Poblacion ang kanunay’ng mabiktima sa baha.
Ang maong mga opisyal sa barangay mibutyag nga dunay usa ka residente diha sa sitio Garden ang giingong namatay tungod sa impeksyon sa samad sa tiil sa sige og ubog niini sa baha diha sa ilang lugar.
Ang nahisgutang namatay niadtong Hunyo 7, 2013 mao si Judith Dela Cuesta, 40-anyos.
Matud ni Bonjoc nga si Dela Cuesta giingong dunay samad sa tiil ug tungod kay gilunopan man ilang balay pirming mahumod sa baha iyang samad.
Giingong mga usa ka semana lang gikan sa sige og ubog ni Dela Cuesta sa baha namatay kini. Si Bonjoc miingon nga base sa death certificate niini sepsis, infected wound, tetanus ang gikamatyan sa ginang.
Sa laing bahin, si Konsehal Danny Caballero nagdudang ang gitabunang sapa kaniadto maoy gitultol sa tubig ug ang culvert nga padung unta sa dagat gitabunan usab sa mga tawo.
Buot karon ni Caballero nga awhagon ang city engineering aron pagpangita og solusyon sa maong problema. (/EIM) (BANAT NEWS)